Ավտոմեքենայի տեխզննման կտրոնի պարտադիր պահանջը հանելու առաջարկը մերժվեց

ՀՀ կառավարությունը բացասական եզրակացություն տվեց Ազգային ժողովի պատգամավոր Հովհաննես Մարգարյանի՝ օրենսդրական նախաձեռնության կարգով ներկայացրած «Ճանապարհային երթևեկության անվտանգության ապահովման մասին» ՀՀ օրենքում լրացում կատարելու մասին» ՀՀ օրենքի նախագծին:

Հիմնավորման համաձայն' գործող իրավակարգավորման պայմաններում անձնական օգտագործման տրանսպորտային միջոցների շուրջ 90 տոկոսը տեխնիկական զննության կտրոններ ստանում են առանց տրանսպորտային միջոցների իրական զննության, այսինքն՝ վարորդները վճարում են ոչ թե ծառայության, այլ թղթի համար: Այդ նկատառումով, ինչպես նաև հաշվի առնելով հարևան Վրաստանի փորձը, նախագծով առաջարկվում է անձնական օգտագործման մարդատար տրանսպորտային միջոցների պարտադիր տեխնիկական զննության պահանջը հանել:

Արդարադատության նախարար Արփինե Հովհաննիսյանն ասաց, որ տրանսպորտային միջոցների տեխնիկապես սարքին վիճակում շահագործելը համարվում է ճանապարհային երթևեկության անվտանգության ապահովման կարևոր երաշխիքներից մեկը, հետևաբար՝ անձնական օգտագործման տրանսպորտային միջոցների տեխնիկական զննության պահանջը հանելը կարող է հանգեցնել ճանապարհային երթևեկության վթարների թվաքանակի աճի:

Արփինե Հովհաննիսյանի խոսքով՝ անհրաժեշտ է ոչ թե հանել պարտադիր տեխնիկական զննության պահանջը, այլ մշակել մեխանիզմներ, որոնց միջոցով հնարավոր կլինի ապահովել տրանսպորտային միջոցների տեխնիկական զննության իրականացումը՝ սահմանելով դրա նկատմամբ իրական հսկողություն: