Երևանում մեկնարկել է ԱՊՀ երկրների միջպետական խորհրդի 48-րդ նիստը

ԱՊՀ երկրների պատվիրակությունները Հայաստանում առաջիկա երկու օրերին կփորձեն ձևավորել տարածաշրջանային միասնական քաղաքականություն շուկայի վերահսկողության, ստանդարտացման, չափագիտության և այլ ոլորտներում: Երևանում մեկնարկեց Անկախ պետությունների համագործակցություն (ԱՊՀ) երկրների Ստանդարտացման, չափագիտության և սերտիֆիկացման միջպետական խորհրդի 48-րդ նիստը:

Այն վարում էին Միջպետական խորհրդի համանախագահներ Բելառուսի Ստանդարտացման պետական կոմիտեի նախագահ Վիկտոր Նազարենկոն և ՀՀ էկոնոմիկայի նախարարի տեղակալ Գառնիկ Բադալյանը:

«Քննարկելու ենք ԱՊՀ տարածաշրջանի երկրների համար մի շարք կարևորագույն հարցեր, որոնք մասնավորապես առնչվում են տեխնիկական կարգավորման, ստանդարտացման, չափագիտության, հավաստագրման, համապատասխանության գնահատման և շուկայի վերահսկողության ոլորտներին»,- ասաց էկոնոմիկայի նախարարի տեղակալ Գառնիկ Բադալյանը' հավելելով, որ քննարկման նպատակն է նշված ոլորտներում ձևավորել տարածաշրջանային միասնական քաղաքականություն:

Նիստի ավարտին կստորագրվի միջպետական արձանագրություն:

Դեկտեմբերի 11-ին տեղի կունենա «Ստանդարտացումը և նորարարությունները» գործարար համաժողովը, որի ընթացքում ստանդարտների ազգային ինստիտուտի և «Համազգային վստահություն» խորհրդի կողմից կշնորհվեն մրցանակներ' միջպետական ստանդարտացման ոլորտում առավել ակտիվ և արդյունավետ մասնակցություն դրսևորած հայկական կազմակերպություններին:

ԱՊՀ երկրների պատվիրակությունների ղեկավարները կհանդիպեն ՀՀ փոխվարչապետ, Միջազգային տնտեսական ինտեգրման և բարեփոխումների նախարար Վաչե Գաբրիելյանի հետ' քննարկելու միջպետական ստանդարտացման հեռանկարները, ինչպես նաև' հարցեր, որոնք վերաբերում են Միջպետական խորհրդում Հայաստանի մասնակցությանը: