Տարին բավական ունիվերսալ ստացվեց, այն էլ՝ վատ իմաստով. Բաբկեն Պիպոյան

Սպառողների իրավունքների պաշտպանության ոլորտում հետընթաց ենք գրանցել. եթե նախորդ տարիներին սպառողի իրավունքի ոտնահարման դեպքերին պատկան մարմինները որոշ չափով արձագանքել են, ապա այս տարի լիազոր կառույցները տեղից չեն շարժվել: Մարդու իրավունքների պաշտպանության օրվա համատեքստում լրագրողների հետ հանդիպմանը հայտարարեց «Իրազեկ և պաշտպանված սպառող» ՀԿ նախագահ Բաբկեն Պիպոյանը:

«Այս տարին բավական ունիվերսալ ստացվեց, այն էլ՝ վատ իմաստով, առաջընթաց ունենալու փոխարեն' հետ գնացինք, նույնիսկ կայուն վատ վիճակում չմնացինք, ինչպես նախորդ տարիներին էր»,- շեշտեց նա:

Անցնելով ոլորտային գնահատականների՝ Բաբկեն Պիպոյանը նախ անդրադարձավ ոչ պարենային ապրանքների վերահսկողությանը և փաստեց, որ տարվա ընթացքում գրանցվեցին գազաբալոնների պայթյուններից մահացության դեպքեր, մինչդեռ իրավասու գերատեսչությունը՝ Էկոնոմիկայի նախարարությունը, սահմանափակվեց միայն պոպուլիստական հայտարարություններով:

«Արտակարգ իրավիճակների նախարարությունը գոնե որոշակի գործողություններ իրականացրեց, իսկ Էկոնոմիկայի նախարարությունը, որը հիմնական քաղաքականություն մշակողն էր, բացառապես անգործության էր մատնված»,- հայտարարեց Բաբկեն Պիպոյանը՝ հիշեցնելով, որ բազմաթիվ հրապարակումներով հորդորել են ականջալուր լինել. «Եթե տուգանք չէր կիրառվելու, գոնե կարելի էր պարտադրել բոլոր գազալցակայաններին, որ վահանակների վրա հրապարակեն, թե ինչ ճնշման տակ կարելի է լիցքավորում իրականացնել և ինչ ջերմաստիճանում: Սպառողի համար էլ «թեժ գիծ» պետք է լիներ, որպեսզի խախտում նկատելու դեպքում սպառողը կարողանար զանգ կատարել։ Այս համակարգի ներդրումը կտաներ որոշակի ինքնակարգավորման»:

Բաբկեն Պիպոյանը շեշտեց՝ Էկոնոմիկայի նախարարությունը գերազանցեց ինքն իրեն՝ պետական վերահսկողությունից դուրս թողնելով ոլորտը, քանի որ ներկա պահին փաստացի չի գործում շուկայի վերահսկողության պետական տեսչությունը: Պատճառը՝ տեսչական բարեփոխումներից հետո դեռ հարմար պետ չեն գտել:

Անցնելով Հանրային ծառայությունները կարգավորող հանձնաժողովի գործունեությանը, սպառողների շահերի պաշտպանությամբ զբաղվող հասարակական կազմակերպության ղեկավարը նկատեց՝ եթե Էկոնոմիկայի նախարարությունը գոնե մեկ-երկու դեպքի արձագանքել է, ապա ՀԾԿՀ-ն բացարձակ ոչինչ չի արել: Մասնավորապես՝ միայն ՀԵՑ-ի վաճառքից հետո պարզ դարձավ, որ եղել են էլեկտրաէներգիայի կորուստներ:

Սննդի անվտանգության պետական ծառայությունն իր անգործությամբ որևէ բանով ըստ Պիպոյանի, չի տարբերվում Հանրային ծառայությունները կարգավորող հանձնաժողովից, երբ այս տարի գրանցվել է սննդային թունավորումների բարձր ցուցանիշ և Առողջապահության նախարարությունը հրապարակել դրանց պատճառները:

Մարդու իրավունքների պաշտպանության օրը Բաբկեն Պիպոյանը չանտեսեց նաև ՄԻՊ-ին. չցանկանալով սուր քննադատությունների ենթարկել կառույցին՝ համարելով դա ՀՀԿ-ի մենաշնորհը, սպառողների իրավունքների պաշտպանն ակնարկեց, որ Պաշտպանը թունավորումների և էլեկտրաէներգիայի թանկացման դեպքերում չի եղել սպառողների կողքին: