Ուորլիքը տեղի տվեց Ադրբեջանի սպառնալիքներին

ԵԱՀԿ Մինսկի խմբի ԱՄՆ համանախագահ Ջեյմս Ուորլիքը տեղի է տալիս Ադրբեջանի սպառնալիքներին՝ մի քանի օր անընդմեջ անելով հայտարարություններ, որոնք բխում են ադրբեջանական կողմի շահերից, ընդ որում' դա արվում է ադրբեջանական լրատվամիջոցներով' անտեսելով հայկական լրատվամիջոցների կողմից նրան հղված հարցերը:

ԱՄՆ-ում դեկտեմբերի 8-ին Արցախի Հանրապետության արտգործնախարար Կարեն Միրզոյանի հետ Ուորլիքի հանդիպումից հետո պաշտոնական Բաքվի կողմից վերահսկող ադրբեջանական լրատվամիջոցներն ու բարձրաստիճան պաշտոնյաները սկսեցին մեղադրել համանախագահին Միացյալ Նահանգների տարածքում «չճանաչված հանրապետության արտգործնախարարի» հետ հանդիպելու համար: Անգամ ադրբեջանական Trend-ը, իբր հենվելով «ԱՄՆ-ում դիվանագիտական իր աղբյուրների վրա», հայտարարեց, որ մոտ ապագայում Մինսկի խմբի ԱՄՆ համանախագահի փոփոխություն է լինելու:

Կարճ ժամանակ անց, սակայն, Ուորլիքը, ասես վախեցած ադրբեջանական սպառնալիքներից ու փորձելով փրկել իր վարկն Ադրբեջանում, սկսեց մեկը մյուսի հետևից հարցազրույցներ տալ ադրբեջանական ԶԼՄ-ներին, որոնք ունեին, մեղմ ասած, ոչ անաչառ բովանդակություն: Ուշագրավ է, որ Ադրբեջանի կողմից Արցախի ուղղությամբ տանկեր կիրառելուց անմիջապես հետո ամերիկացի համանախագահին հարցեր էր հղել նաև «Արմենպրես» լրատվական գործակալությունը, որի պատասխանները, սակայն, գործակալությունն այդպես էլ չստացավ համանախագահից: Չի բացառվում, որ Ուորլիքի աշխ ատակազմից ավելի ուշ մեր գործակալությանը պատասխանեն, թե հարցերի պատասխաններն ուշացվել են «զբաղվածության» պատճառով կամ բերվի ցանկացած այլ պատճառաբանություն, սակայն ակներև է, որ նմանօրինակ բացատրությունները կորցնում են իրենց արժեքը՝ հաշվի առնելով, որ նույն ժամանակահատվածում Ուորլիքը կարողանում է ժամանակ գտնել ադրբեջանական ԶԼՄ-ների հարցերին պատասխանելու համար և չի պահպանում պարիտետը կողմերի լրատվամիջոցների միջև: Այնինչ, Մինսկի խմբի համանախագահները ևս անհասցե հայտարարություններով նպաստում են Ադրբեջանի կողմից լարվածության ու ժգնացմանը և հրադադարի հաստատումից հետո առաջին անգամ տանկերի ու ծանր զրահատեխնիկայի կիրառմանը: