Դինքի սպանության հարցով գործ կհարուցվի թուրք նախկին պաշտոնյաների դեմ

Ստամբուլի՝ ծանր հանցագործությունները քննող 14-րդ դատարանն ընդունել է պոլսահայ լրագրող Հրանտ Դինքի սպանության գործով կազմված մեղադրական ակտը, որով պահանջվում է դատական գործ հարուցել մի շարք պաշտոնյաների դեմ: Դրանց շարքում է նաև Թուրքիայի անվտանգության գլխավոր վարչության հետախուզական բաժնի ներկայիս ղեկավար Էնգին Դինչը: Ինչպես հաղորդում է «Արմենպրես»-ը, այս մասին տեղեկացնում է թուրքական «Հուրիեթ» պարբերականը:

Դատարանը որոշում է կայացրել միավորել այս նոր գործը Ստամբուլի՝ ծանր հանցագործությունները քննող 5-րդ դատարանում ընթացող Դինիք սպանության մայրի գործի հետ: 5-րդ դատարանում հիմնական դատական գործով հերթական նիստը կկայանա դեկտեմբերի 22-ին:

Թուրքիայի Գլխավոր դատախազության կողմից հաստատված, այնուհետև 14-րդ դատարանի կողմից ընդունված մեղադրական ակտով նախատեսվում է գործ հարուցել 26 անձի նկատմամբ, որոնց շարքում են Տրապիզոնի անվտանգության հետախուզական վարչության նախկին ղեկավար, ներկայումս հետախուզական գրասենյակի ղեկավար Էնգին Դինչը, Տրապիզոն նահանգի անվտանգության նախկին ղեկավար Ռեշաթ Ալթայը, Ստամբուլ նահանգի անվտանգության հետախուզական բաժնի ղեկավար Ահմեթ Իլհան Գյուլերը, հետախուզական վարչության C բաժնի ղեկավար Ալի Ֆուաթ Յըլմազերը, Ստամբուլի նախկին փոխնահանգապետ Էրգուն Գ յունգորը, Ստամբուլի նախկին ոստիկանապետ Ջելալեթին Ջերահը, Ստամբուլի հետախուզական վարչության նախկին պետ Ռամազան Աքյուրեքը, Տրապիզոնի ոստիկանության հետախուզության բաժնի նախկին պետ Ֆարուք Սարըն, անվտանգության աշխատակիցներ Մուհիթթին Զենիթը, Օզքան Մումջուն, Էրջան Դեմիրը և այլք:

Ստամբուլի «Ակոս» թերթի հայազգի խմբագրապետ Հրանտ Դինքը սպանվել է 2007 թվականի հունվարի 19-ին' խմբագրության առջև նրա վրա կատարված զինված հարձակման արդյունքում: 2012 թվականի հունվարի 17-ին դատարանի որոշմամբ' Դինքի սպանության կազմակերպիչ Յասին Հայալը դատապարտվեց ցմահ բանտարկության, իսկ անմիջական հանցագործ Օգյուն Սամասթը' 22 տարվա ազատազրկման:

2014 թվականի հոկտեմբերին Ստամբուլի ծանր հանցագործությունների գործերով 5-րդ դատարանը որոշում է կայացրել Հրանտ Դինքի սպանության գործով դատավարությունն սկսել զրոյից: