Պարագվայում արտակարգ դրություն է հայտարարված հեղեղումների պատճառով

Արտակարգ դրություն է հայտարարված Պարագվայի մայրաքաղաքում եւ երկրի հինգ դեպարտամենտներում, որոնք տուժել են հեղեղումներից: Ինչպես տեղեկացնում է «Արմենպրես»-ը, համապատասխան որոշումը դեկտեմբերի 16-ին ընդունել է հարավամերիկյան հանրապետության խորհրդարանը:

Արտակարգ դրության ռեժիմի սահմանումը թույլ է տալիս իշխանություններին բյուջեից լրացուցիչ միջոցներ հատկացնել անօթեւան մնացածներին օգնելու համար: Հաղորդվում է, որ մինչ այժմ տարհանվել է գրեթե 50 հազար մարդ:

Ասունսիոնում հեղեղման գոտում են հայտնվել աղքատ շրջանները, որտեղ բնակվում է շուրջ 100 հազար մարդ:

Տարերային աղետի պատճառ է դարձել Պարագվայ գետի վարարումը, որն ափերից դուրս է եկել տարվա ընթացքում արդեն երրորդ անգամ: Ջրի մակարդակը գերազանցել է յոթ մետրի նշագիծը եւ մոտեցել 1983 թվականի ռեկորդին, երբ ջուրը բարձրացել էր 7,72 մետրով, հաղորդել է ՏԱՍՍ-ը: