Իսպանիայի սոցիալիստների առաջնորդը «նոր ապագա է» կանխագուշակում ընտրություններից հետո

Իսպանիայի սոցիալիստական աշխատավորական կուսակցության առաջնորդ Պեդրո Սանչեսը գտնում է, որ դեկտեմբերի 20-ին անցկացվող խորհրդարանական ընտրություններից հետո երկրին սպասում է «նոր ապագա»։

Ինչպես տեղեկացնում է «Արմենպրես»-ը, վկայակոչելով «ՌԻԱ Նովոստի»-ն, իր քվեարկությունը կատարելուց Սանչեսն անցկացվող ընտրությունները «պատմական» է անվանել, և, նրա խոսքով, դրանք «կհանգեցնեն կուրսի փոփոխության, որն անհրաժեշտ է Իսպանիային և որը պահանջում է իսպանացիների մեծամասնությունը»։

Իսպանիայում դեկտեմբերի 20-ին անցկացվում են խորհրդարանական ընտրություններ, որոնց ընթացքում երկրի քաղաքացիներն ընտրում են կոնգրեսի 350 պատգամավորների և 208 սենատորների։ Ընտրություններին իրենց թեկնածությունն առաջադրել են 13 կուսակցություններ և միավորումներ։ Ընտրությունների նախօրեին անցկացված հարցումները ցույց են տվել, որ առաջին տեղը կզբաղեցնի Իսպանիայում վերջին 4 տարիներին իշխող ժողովրդական կուսակցությունը, սակայն չի կարողանա ստանալ բացարձակ մեծամասնություն։

Եվս երեք կուսակցություններ հավակնում են հաջորդ երեք տեղերն զբաղեցնելուն. դրանք են՝ Իսպանիայի սոցիալիստական աշխատավորական կուսակցությունը, աջ կենտրոնամետ «Քաղաքացիներ»-ը (այս կուսակցությունը 10 տարի առաջ հիմվել է Կատալոնիայում և պաշտպանում է երկրի տարածքային ամբողջականությունը) ու Podemos-ը, որը պաշտոնապես կուսակցություն է դարձել միայն 2014թ. հունվարին՝ 15M հասարակական շարժման հիման վրա։

Ձայնի իրավունք ունեն 36.5 մլն իսպանացիներ, որոնցից 34.6 միլիոնն ապրում են Իսպանիայում, 1.9 միլիոնը՝ արտերկրում։ Երկրում և արտերկրում բացվել են 22.9 հազար ընտրատեղամասեր։ Ընտրությունների ընթացքում կարգի պահպանությանը հետևում են անվտանգության տարբեր ծառայությունների 92.7 հազար ներկայացուցիչներ։