Ադրբեջանում ապրանքների գները 30-50 տոկոսով աճել են

Ադրբեջանի ազգային արժույթի` մանաթի երկրորդ արժեզրկումից հետո այդ երկրում բոլոր, այդ թվում` սննդային ապրանքների գները 30-50 տոկոսով աճել են:

Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը` հղում կատարելով ադրբեջանցի փորձագետներին:

Թերթի հետ զրույցում տնտեսագետ փորձագետ Մահամեդ Թալըբլըն կարծիք է հայտնել, որ Ադրբեջանում բոլոր ապրանքների գների աճը դեռեւս շարունակվելու է մոտ մեկ տարի:

«Այս գործընթացը, որը կշարունակվի մոտ մեկ տարի, ոչ թե մեկ տնտեսական հատվածի, այլ տարբեր հայտվածների միջեւ առկա խնդիր է: Այսինքն՝ սա միայն ֆինանսական խնդիր չէ, այլ կապված է արտահանման, ներկրման եւ արտադրության խնդիրների հետ, եւ առաջիկա մեկ տարվա ընթացքում որեւէ դրական արդյունք ակնկալել հնարավոր չէ», -կանխատեսել է նա:

Ադրբեջանում մանաթը երկրորդ անգամ արժեզրկվել է 2015 թվականի դեկտեմբերի 21-ին: Անցյալ տարվա փետրվարին մոտ 35 տոկոսով արժեզրկվելու հետ ադրբեջանական մանաթը դոլարի նկատմամբ իր արժեքը կորցրել է 98 տոկոսից ավելի:

Haqqin.az լրատվական կայքը հայտնում է, որ մանաթի արժեզրկման պատճառով Բաքվում փակվում են նաեւ հրուշակեղենի խանութները:

«Գներն աճում են, վարձակալները բարձրացրել են գները, իսկ ես դեռ պետք է աշխատավարձ վճարեմ վաճառողներին եւ հրուշակագործին: Այդ պատճառով որոշել եմ ընդհանրապես փակել խանութը»,- կայքի հետ զրույցում ասել է Բաքվում հրուշակեղենի խանութպան Էսմեր Իբրահիմովան՝ նշելով, որ գործընթացի վրա բացասական ազդեցություն է թողնում այն, որ հրուշակեղենի արտադրության համար ամբողջ հումքը դրսից բերովի է, որը նույնպես թանկացել է: