Մուսալեռում տեղի ունեցած սպանության դեպքով Արմեն Պառավյանը կալանավորվել է

Ոստիկանության ծառայողների ձեռնարկած օպերատիվ-հետախուզական միջոցառումների և բացատրական աշխատանքների շնորհիվ՝ հունվարի 11-ին, ժամը 12.45-ին, Արմեն Պառավյանն ինքնակամ ներկայացել է ոստիկանության Վաղարշապատի բաժին:

Արմեն Պառավյանը կալանավորված է:

Քննությունը շարունակվում է:

Հիշեցնենք, որ 2016թ. հունվարի 6-ին' ժամը 00:20-ի սահմաններում Արմավիրի մարզի Մուսալեռ գյուղի տարածքում գործող «Մուսալեռ» հյուրանոցա-ռեստորանային համալիրում մի քանի երիտասարդ կոպիտ կերպով խախտել են հասարակական կարգը, հայհոյել համալիրի աշխատակիցներին, բռնություն գործադրել համալիրի աշխատակիցներ Վանուշ Խաչատրյանի և Սմբատ Խլղաթյանի, ինչպես նաև՝ վերջինիս կանչով համալիր եկած Արմավիրի մարզի Տարոնիկ գյուղի բնակիչներ Արամ Կարապետյանի ու Արմեն Խլղաթյանի նկատմամբ:

Նախնական քննության տվյալներով' վիճաբանության ընթացքում դրա մասնակիցներից մեկը' 31-ամյա Ա.Բաբայանը, իրեն կարգի հրավիրելու' Սմբատ Խլղաթյանի դիտողությունից վրդովված, սեփական անձի «առավելություններն» ընդգծելու մոլուցքից դրդված, իր մոտ գտնվող հրազենով կրակել է Ա.Կարապետյանի և Ա.Խլղաթյանի ուղղությամբ:

Փախուստի դիմելիս ատրճանակն ուղղել է նաև Ս.Խլղաթյանի ուղղությամբ և փորձել կրակել, սակայն իր կամքից անկախ հանգամանքներում, մասնավորապես' ատրճանակը խափանվելու հետևանքով հանցագործությունն ավարտին չի հասցրել:
Ստացված հրազենային վնասվածքից Արամ Կարապետյանը մահացել է, իսկ Արմեն Խլղաթյանը հրազենային վնասվածքներով տեղափոխվել է Երևան քաղաքի թիվ 1 համալսարանական հիվանդանոց: