Հայերը ոչ մի տեղ իրենց չեն կորցնում

Խոզի գրիպի մասին լուրերը նոր շունչ հաղորդեցին հատկապես հայկական «նորաձևությանը»: Մանավանդ վերջին օրերին Երևանի փողոցներում հաճախ կարելի է տեսնել երիտասարդների, ովքեր քայլում են դիմակներ հագած: Առաջին հայացքից միգուցե կթվա, թե դրանում տարօրինակ բան չկա, վարակից պաշտպանվելու համար է, բայց փողոցու՞մ, բաց տարածության մե՞ջ: Դիմակ հագնելն ունի պաշտպանական ֆունկցիա, եթե մարդը գտնվում է փակ տարածությունում, որտեղ օդը հնարավոր է՝ վարակված լինի, սակայն բաց տարածությունում դիմակ կրելը առնվազն անտրամաբանական է և պարտադիր չէ բժիշկ լինել, որպեսզի այդքանը հասկանալ: Մնում է մի վարկած՝ սա պարզապես նոր «մոդա» է, «գլամուրային» մեր երիտասարդների համար նոր իմիջ: Տեսնու՞մ եք՝ հայերը ոչ մի տեղ իրենց չեն կորցնում, նույնիսկ խոզի գրիպի մեջ հետաքրքիր բան են գտնում...

Այս տրամաբանությամբ չի բացառվում, որ շուտով մեր երիտասարդները կսկսեն ձեռք բերել նաև ավելի «նորաոճ» դիմակներ՝ հետաքրքիր դիզայներական լուծումներով: Պարզապես մի բան պետք է հաշվի առնեն մեր «նորաձևները»՝ որ խոզի գրիպը երկար տևել չի կարող, այն կվերջանա և դրանից հետո արդեն փողոցներում նորաձև դիմակներով քայլելը ավելի ծիծաղելի կդիտվի:

Կարեն Վարդանյան