Apple-ը և Samsung-ը օգտագործում են երեխաների աշխատանքի արգասիքները. Amnesty

 Amnesty International իրավապաշտպան կազմակերպությունը պնդում է, որ բազմաթիվ տեխնոլոգիական ընկերություններ, ներառյալ Apple-ը, Samsung-ը և Soni-ն, ինչպես պարզվել է, ի վիճակի չեն պարզագույն ստուգումներ անցկացնել՝ համոզվելու, որ իրենց արտադրանքի մեջ օգտագործվող հանքանյութերը չեն արդյունահանվում երեխաների կողմից, տեղեկացնում է «Արմենպրես»-ը՝ հղում անելով BBC-ին: Զեկույցի հեղինակները հետևել են, թե ինչպես են միջնորդները կոբալտ գնում Կոնգոյի Ժողովրդավարական Հանրապետության (ԿԺՀ) հանքերում, որտեղ ակտիվորեն օգտագործվում է երեխաների աշխատանքը, և դրանք վերավաճառում Zhejiang Huayou Cobalt Ltd չինական հսկայի դուստր ընկերությանը:

Իր հերթին Zhejiang Huayou Cobalt Ltd-ից հանքանյութերը գնում են տասից ավելի անդրազգային կորպորացիաներ: Կոբալտը լիթիումա-իոնային ուժակուտակիչների հանգուցային բաղադրիչն է, այդ հանքանյութի առնվազն 50 տոկոսն արդյունահանվում է Կոնգոյում:

Իրավապաշտպանների տվյալներով՝ 2014 թվականի սեպտեմբերից մինչև 2015 թվականի դեկտեմբերն ընկած ժամանակաշրջանում առնվազն 80 մարդ է գետնի տակ զոհվել ԿԺՀ-ի հարավում: Amnesty-ն նաև ցուցմունքներ է հավաքել յոթ և ավելի մեծ տարիքի երեխաներից, որոնք ենթադրաբար աշխատում են հանքավայրերում:

Զեկույցում հիշատակվող ընկերությունները հայտարարել են, որ միջոցներ են ձեռնարկում երեխաների աշխատանքը բացառելու նպատակով: