Ադրբեջանը թաքցրել է 2015 թվականին ԶՈւ կազմում մահացած 11 զինծառայողների անունները

«Խազար» ռազմական հետազոտությունների ինստիտուտի տնօրեն Ջասուր Սումերենլին հայտարարել է, որ Ադրբեջանի ռազմական դատախազ Խանլար Վելիեւի հունվարի 29-ին Ռազմական դատախազությունունում անցկացված կոլեգիայի նիստում զինված ուժերի կազմում 2015 թվականին մահացած զինծառայողների վերաբերյալ հնչեցրած թվաքանակի հետ կապված հակասություններ կան:

Խոսելով Ադրբեջանում ռազմական զորամիավորումներում տեղի ունեցած մի շարք ծանր եւ հատկապես ծանր հանցագործությունների բացահայտման մասին, Խանլար Վելիեւը հայտարարել է, որ 2015 թվականին գրանցված հանցագործությունների 99,6 տոկոսը բացահայտվել է, զորամիավորումներում բոլոր տեսակի հանցագործությունների թիվը, 2014 թվականի համեմատ, զգալիորեն նվազել է:

Ինչպես հաղորդում է «Արմենպրես»-ը, ադրբեջանական Meydan TV-ի հետ զրույցում Ջասուր Սումերենլին հերքել է Ռազմական դատախազությանը:

«Միանշանակ է, որ Ադրբեջանի ԶՈՒ-ում ոչ մարտական կորուստների թվի նվազման ուղղությամբ միտում առկա չէ: Մեր կատարած հետազոտությունների համաձայն' 2015 թվականին Ադրբեջանի անվտանգության եւ պաշտպանության հատվածում 78 զինծառայողներ տարբեր պատճառներով մահացել են: Մահերից 68-ը տեղի են ունեցել պաշտպանության նախարարության զորամասերում. 34-ը' փոխհրաձգությունների, 3-ը' ականի պայթյունի, ոչ կանոնադրական հարաբերությունների, բռնությունների եւ զենքի հետ անզգույշ վարվելու հետեւանքով' 12 զինծառայող, 7 զինվոր ինքնասպանություն է գործել, 8 հոգի մահացել են դժբախտ պատահարների եւ այլ միջադեպերի արդյունքում, 4 զինծառայողներ մահացել են տարբեր հիվանդություններից:

2003 թվականից մինչեւ այսօր տարբեր պատճառներով մահացել են 900-ից ավելի զինծառայողներ: Դրանց մեջ հակառակորդի գնդակից մահացածների թիվը մոտ 220 հոգի է», -ասել է նա:

Ջասուր Սումերենլին հայտնել է, որ թե’ 2015 թվականի, թե’ անցած 13 տարիների համար Ռազմական դատախազությունը երբեք որեւէ հաշվետվություն հասարակությանը չի ներկայացրել զինծառայողների մահվան (հատկապես' ոչ մարտական պայմաններում) պատճառների եւ հենց այդ մահերի համար պատժվածների վերաբերյալ: Հակառակը' շատ դեպքերում, ըստ նրա, Ռազմական դատախազությունը հասարակությանը ոչ ճշգրիտ եւ շփոթեցնող տեղեկություններ է հայտնում: Որպես օրինակ, նա նշել է Խանլար Վելիեւի կողմից 2015 թվականի հոկտեմբերի 1-ին «Խալգ» թերթում բերված ԶՈՒ շարքերում մահերի եւ հանրագործությունների թվերը, որոնք, ըստ դատախազության, նախկին տարիների համեմատ, նվազել են:

Նրա խոսքով ' իրենց հետազոտութունները ցույց են տալիս, որ 2003 թվականի համեմատ, կորուստների թիվը ոչ թե պակասել, այլ' աճել է: Զորամասերում տարբեր պատճառներով սպանված զինվորների ծնողներն այլ պնդումներ են հանդես բերում եւ նրանց մեծ մասը համաձայն չէ Ռազմական դատախազության նշած արդյունքների հետ: Այսօր էլ շարունակվում է 6-7 տարի առաջ սպանված զինվորների հետ կապված բազմաթիվ ծնողների պայքարը, նրանք համաձայն չեն դատախազության կողմից անցկացված միջոցառումների հետ եւ շարունակում են բողոքներ ներկայացնել իրավապահ մարմիններ եւ դատարաններ:

«Եւս մեկ հետաքրքիր եւ հակասական պահ. Ռազմական դատախազը հայտնում է, որ 2015 թվականին, 2014 թվականի համեմատ, Զինված ուժերում եւ օրենսդրությամբ նախատեսված այլ զինված միավորումներում մահվան դեպքերը 2,3 տոկոսով նվազել են: Մեր հետազոտությունների համաձայն' 2014 թվականին Զինված ուժերում եւ օրենսդրությամբ նախատեսված այլ զինված միավորումներում մահացել է 91 զինծառայող: Այսպիսով, Խանլար Վելիեւի տված տեղեկության (2,3 տոկոս նվազում) հիման վրա 2015 թվականին պետք է մահացած լինեին մոտ 89 զինծառայող: Սակայն, ԶԼՄ-ների հաղորդագրությունների վրա մեր կատարած մոնիթորինգի տվյալներով' 2015 թվականին Անվտանգության եւ պաշտպանության հատվածում ընդհանուր առմամբ մահացել է 78 զինծառայող: Այսպիսով, պարզ է դառնում, որ 2015 թվականին մահացած մոտ 11 զինծառայողների անուններ մամուլին եւ, բնական է' մեզ հայտնի չէ, ինչը լուրջ հարցեր է ծնում», -ասել է նա:

«Խազար»-ի տնօրենը հավելել է, որ ադրբեջանական բանակում զինծառայողների մահերի վիճակագրության թաքցնելը լուրջ կասկածներ է ստեղծում բանակաշինության եւ հանցագործության դեպքերի, այդ թվում' կոռուպցիայի դեմ պայքարի բնագավառում ուժային կառույցների յուրաքանչյուր ջանքերի նկատմամբ: