Սեյրան Օհանյանը զինծառայության մեջ գտնվող ԵՊՀ երկու ուսանողի արձակուրդ հայտարարեց

ՀՀ պաշտպանության նախարարի հրամանով պարտադիր ժամկետային զինվորական ծառայության մեջ գտնվող ԵՊՀ երկու ուսանող 10 օր արձակուրդ է ստացել: Այս մասին ՀՀ պաշտպանության նախարար Սեյրան Օհանյանը հայտնեց ԵՊՀ-ում դասախոսների և ուսանողների հետ հանդիպմանը, որին ներկա էին նաև արձակուրդ ստացած զինծառայողները: «Այս տարի ես եկել եմ նաև այն խելացի զինվորների, կրտսեր հրամանատարների, սերժանտների հետ միասին, ովքեր ձեր բուհի սաներն են: Նրանց համապատասխան կրթության և դաստիարակության մակարդակը նրանք այսօր օգտագործում են կրտսեր հրամանատարների գործունեության իրականացման ընթացքում: Դա ամենադժվար գործերից մեկն է բանակում, որովհետև նրանք են ամենամոտը գտնվում զինվորին, նրանք են զինվորների մոտ ձևավորում համապատասխան հատկա նիշներ, նրանք են, որ կարող են մտնել զինվորի ներաշխարհի մեջ ու այնտեղ ինչ-որ փոփոխություններ անել»,- նշեց նախարարը:

Սեյրան Օհանյանը նշեց, որ խոսքը կրտսեր սերժանտ Հարություն Զավարյանի և կրտսեր սերժանտ Հակոբ Վարդանյանի մասին է: «Նրանք երկուսն էլ սերժանտներ են, երկուսն էլ ծառայում են առաջին գծի զորամասերում: Ես շնորհակալ եմ ձեր ծառայության համար, և ձեր ընկերների, ուսանողների ու մանավանդ ձեր դասախոսների ներկայությամբ ձեզ համար լավագույն խրախուսումը կլինի 10-օրյա արձակուրդը»,- եզրափակեց նախարարը:

Սեյրան Օհանյանը բանակ-հասարակություն կապի ամրապնդման գործում ներդրած ջանքերի համար մեդալներով, պատվոգրերով ու հուշանվերնով պարգևատրեց ԵՊՀ մի խումբ դասախոսների և ուսանողների: