Նիկոլայ Բորդյուժան 2017 թվականին կթողնի ՀԱՊԿ-ի գլխավոր քարտուղարի պաշտոնը

Հավաքական անվտանգության պայմանագրի կազմակերպության գլխավոր քարտուղար Նիկոլայ Բորդյուժան 2017 թվականին կթողնի իր պաշտոնը, նրան կփոխարինի կազմակերպության անդամ այլ երկրի ներկայացուցիչ: Այդ մասին, ինչպես տեղեկացնում է «Արմենպրես»-ը, հղում անելով ՏԱՍՍ-ին, հայտնել է Բորդյուժան ինքը:

Ավելի վաղ հաղորդվել է, որ ՀԱՊԿ-ի գլխավոր քարտուղարի պաշտոնում Բորդյուժայի լիազորությունները երկարացվել են մինչև 2017 թվականի հունվարի 1-ը: Այդ պաշտոնը նա զբաղեցնում է 2003 թվականից: Բորդյուժան նաև նշել է, որ ՀԱՊԿ-ի երկրներում անվտանգության հետ կապված իրադրությունը ներկայում ավելի կայուն է, քան Արևմտյան Եվրոպայի առանձին պետություններում: «Եթե ընդհանուր եզրակացություն անենք, ըստ իս՝ մեր պետություններում իրադրությունն ավելի կայուն ու կանխատեսելի է, քան Արևմտյան Եվրոպայի մի շարք երկրներում»,- հայտարարել է նա:

Բորդյուժան ընդգծել է, որ անցյալ տարի կազմակերպության ողջ գործունեությունը միտված է եղել ՀԱՊԿ-ի մեջ մտնող երկրների կայունության և անվտանգության ապահովմանը:

Հավաքական անվտանգության մասին պայմանագիրն ստորագրվել է 1992 թվականի գարնանը և ուժի մեջ մտել 1994 թվականին: ՀԱՊԿ-ն, որպես այդպիսին, կազմավորվել է 2002 թվականի գարնանը: Այժմ նրա մեջ մտնում են Ռուսաստանը, Հայաստանը, Բելառուսը, Ղազախստանը, Ղրղզստանը և Տաջիկստանը: