Փոլ ՄաքՔարթնիին Լոս Անջելեսում թույլ չեն տվել մասնակցել Grammy -ի երեկույթին

Աշխարհի ամենահայտնի և անվանի երաժիշտներից մեկին՝ The Beatles խմբի նախկին մասնակից ՄաքՔարթնիին, Լոս Անջելեսում թույլ չեն տվել մասնակցել Grammy մրցանակաբաշխության արարողության ավարտից հետո կայացած երեկույթին: Պատճառն այն է եղել, որ պահակախումբը չի ճանաչել ռոք-բեմի 73-ամյա վետերանին, տեղեկացնում է «Արմենպրես»-ը:

Այս պատմության մասին հայտնի է դարձել TMZ ինտերնետ-հրատարակության լուսանկարչի շնորհիվ, որը նկարել է ՄաքՔարթնիին և փորձել նրան մի քանի հարց տալ: Երաժիշտը փորձել է մտնել Լոս Անջելեսի «Արգայլ» գիշերային ակումբ, որտեղ ամերիկացի ռեփեր Tyga-ն երեկույթ էր կազմակերպել Grammy-ի պարգևատրման արարողությունից հետո: Պահակները հրաժարվել են ներս թողնել «բիթլին»՝ չճանաչելով նրան:

Երեկույթում հայտնվելու երկրորդ փորձից հետո ՄաքՔարթնին տեղի է տվել: «Ինչպե՞ս են VIP-երը հայտնվում այնտեղ: Մեզ ավելի ամրակազմ տղաներ կպահանջվեն»,- հայտարարել է նա, հաղորդել է ՏԱՍՍ-ը: