Ադրբեջանը երկընտրանքի առաջ է. ում կողքին լինել` Թուրքիայի՞, թե Ռուսաստանի

Ռուս-թուրքական գերլարված հարաբերությունների, ինչպես նաեւ Սիրիա ներխուժելու Անկարայի նկրտումների հետ կապված Ադրբեջանում թեժ քննարկումներ են ընթանում Թուրքիայի՞, թե Ռուսաստանի կողքը լինելու հարցի շուրջ:

Ինչպես հաղորդում է «Արմենպրես»-ը, «Ազատություն» ռադիոկայանի ադրբեջանական ծառայությունը հարցում է անցկացրել ադրբեջանցի քաղաքագետների, պատգամավորների եւ շարքային բնակիչների միջեւ:

Ադրբեջանի խորհրդարանի պատգամավոր Ռասիմ Մուսաբեկովն ընտրությունը կապել է երկրի աշխարհագրական դիրքի եւ վտանգավոր լինելու հետ: Միաժամանակ նա գտնում է, որ Թուրքիան իրենց ավելի հոգեհարազատ է:

«Բացառվում է, որ Ադրբեջանը Թուրքիայի կողքը չլինի: Սակայն, եթե թուրք-ռուսական հակամարտությունը վերածվի ռազմական մակարդակի եւ այն թափանցի Հարավային Կովկաս, ապա Ադրբեջանը ստիպված կլինի իրական ընտրություն կատարել: Դա կախված կլինի նրանից, թե Վրաստանը որ կողմում կլինի, ՆԱՏՕ-ն ում կաջակցի, Հայաստանն ու Իրանն ինչպես կպահեն իրենց», -ասել է նա:

Քաղաքագետ Էլշան Շահինօղլուն գտնում է, որ թեեւ ընտրությունը շատ դժվար է, սակայն Ադրբեջանը կանգնած է դրա առաջ եւ փախուստի տեղ չունի:

Ադրբեջանի խորհրդարանի միջազգային հարաբերությունների հանձնաժողովի անդամ Ասիմ Մոլլազադեն տարածաշրջանում յուրաքանչյուր լարվածություն բացասական է համարել Բաքվի համար:

«Մենք շատ կուզեինք, որ տարածաշրջանում վերականգնվեր կայունությունը», -ասել է նա' խուսափելով հստակ պատասխանել հարցին:

Քաղաքագետ Ֆարհադ Մամեդովը գտնում է, որ Բաքուն ոչ մի կերպ չի կարող ազդել տարածաշրջանային զարգացումների վրա:

«Ադրբեջանի նման պետության համար բացահայտ կողմնակալությունը շատ դժվար եւ անթույլատրելի է: Մեր կողմնակալությունը ոչինչ չի կարող փոխել եւ ուժերի վրա որեւէ ազդեցություն չի կարող ունենալ: Այդ պատճառով էլ ցանկանում ենք, որ առկա լարվածությունը չաճի եւ մոտ հեռանկարում նորմալանա», -նշել է նա:

Բաքվի շարքային քաղաքացիների մեծ մասը ցանկություն է հայտնել լինել Թուրքիայի կողքը, սակայն, միաժամանակ, երկյուղ հայտնել, որ նման դեպքում վտանգված կլինի Ռուսաստանում մոտ 2 մլն ադրբեջանցիների անվտանգությունը:

Ադրբեջանի արտգործնախարար Էլմար Մամեդյարովը Թուրքիայի իր գործընկեր Մեվլյութ Չավուշօղլուի հետ փետրվարի 18-ին Բաքվում ունեցած հանդիպումից հետո հայտարարել է, որ Ադրբեջանը դեռեւս որոշում չի ընդունել Ռուսաստանի, Իրանի եւ Բաշար Ասադի վարչակարգի դեմ ստեղծված իսլամական կոալիցիային միանալու հարցում: