«Եվրատեսիլում» Ուկրաինան կներկայացնի Ջամալան՝ Ղրիմի թաթարների մասին երգով

«Եվրատեսիլ-2016» երգի մրցույթում Ուկրաինան կներկայացնի Ղրիմից ծագումով թաթար երգչուհի 32-ամյա Սուսաննա Ջամալադինովան, որը հանդես է գալիս Ջամալա կեղծանունով, տեղեկացնում է «Արմենպրես»-ը՝ հղում անելով The Guardian-ին:

Ջամալան ազգային ընտրական եզրափակչում հաղթել է «1944» երգով, որը Ստալինի օրոք Ղրիմի թաթարների արտաքսման մասին է: Երգչուհին այդ երգը հատուկ մրցույթի համար է գրել՝ իր նախատատի պատմածից տպավորված:

«Այդ սարսափելի տարին ընդմիշտ փոխեց նրբազգաց մի կնոջ՝ իմ նախատատ Նազիլ-խանի կյանքը: Դրանից հետո նրա կյանքն արդեն երբեք առաջվանը չեղավ»,- Ջամալայի խոսքը մեջբերում է The Guardian-ը:

Եզրափակիչում երգչուհու մրցակիցների թվում էին հայտնի կոլեկտիվներ, ներառյալ SunSay-ը, Pur:Pur-ը և The Hardkiss-ը:

«Եվրատեսիլ-2016» երգի մրցույթը տեղի կունենա մայիսին Ստոկհոլմում, հաղորդել է ՌԻԱ Նովոստին: