Ընդդիմադիր ուժերը պարտավոր են կանգնել լրագրողների կողքին. Արմեն Մկրտչյան

«Հայազն» կուսակցությունը դատապարտում է ԱԺ պատգամավոր Մհեր Սեդրակյանի պահվածքը լրագրողների նկատմամբ։ Նշենք, որ վերջինս լրագրողներին «նախիր» էր անվանել։ Այս մասին ԼՈՒՐԵՐ.com-ի հետ զրույցում ասաց կուսակցության վարչության անդամ Արմեն Մկրտչյանը։

«Այս քայլը միայն տվյալ պատգամավորի մեղքը չէ, սա ուղղակի ապացույց էր մի բանի, որ Սերժ Սարգսյանի` օրեր առաջ հնչեցրած «սթափեցնող» հայտարարությունն ընդամենը բլեֆ էր` հերթականն այս 8 տարվա մեջ: Սա ազդանշան էր, որ ոք էլ չի սթափվելու»,- նշեց Մկրտչյանը։

Կուսակցության վարչության անդամ Արմեն Մկրտչյանն ավելացրեց՝ իրենք միանալու են լրագրողների նախաձեռնած ստորագրահավաքին։ «Նախ ասեմ, որ նման վերահսկվող լրատվական դաշտ` անազատ հեռուստաընկերություններ ունենալու պարագայում, ըմբոստ լրագրողները լուսավոր կետ են գորշ իրականության մեջ: Ընդդիմադիր ուժերը պարտավոր են կանգնել լրագրողների կողքին»,- ասաց նա։

Ըստ Մկրտչյանի՝ ԱԺ էթիկայի հանձնաժողովն այս պարագայում ոչ մի դերակատարում բառի բուն իմաստով չի ունենալու։ «Որովհետև իշխանության թիմի ճնշող մեծամասնությունը ծաղրի առարկա է համարում Էթիկայի հանձնաժողովը: Երբ ՀՀԿ, ԲՀԿ ու ՀՅԴ ներկայացուցիչները սահմանադրական փոփոխություններն էին քարոզում, բոլորը միաբերան խոսում էին ինչ-որ արմատական փոփոխության մասին, խոսում էին, որ ընդունումից հետո իրավիճակ է փոխվելու: Փաստորեն փոխվել է: Ցավով եմ նշում, բայց վստահ եմ, որ այս Սահմանադրության ընդունումից հետո ոչ միայն քաղաքացիների սոցիալական վիճակը չի բարելավվելու, այլև բարոյահոգեբանական այս ծանր իրավիճակը գնալով խորանալու է: Շուտով կգա օր, երբ քաղաքացիները կխուսափեն քայլել անգամ փողոցներով, որ պատահական գնդակի զոհ չդառնան: Իրավիճակը դրան է տանում»,- եզրափակեց «Հայազն» կուսակցության վարչության անդամը:

Քրիստինա Աղալարյան