Գիտնականները պատմել են XX դարում ծովի մակարդակի կտրուկ բարձրանալու մասին

Գիտնականների միջազգային խումբը հայտարարել է, որ XX դարում ծովի մակարդակն զգալիորեն ավելի արագ է բարձրացել, քան նախորդ 27 հարյուրամյակներից որևէ մեկի ժամանակ, տեղեկացնում է «Արմենպրես»-ը՝ հղում անելով BBC-ին:

Proceedings of the National Academy of Sciences հանդեսում հրապարակված հետազոտության համաձայն՝ XX դարում ծովի մակարդակը բարձրացրել է 14 սանտիմետրով: Գիտնականների կարծիքով՝ դա ուղղակիորեն կապված է գլոբալ տաքացման հետ, առանց որի այդ ցուցանիշն առնվազն կիսով չափ ցածր կլիներ:

Հետազոտողները պնդում են, որ ծովի մակարդակի բարձրանալու տեմպերն սկսել են կտրուկ աճել Փոքր սառցային շրջանի ավարտից հետո և XIX դարում արդյունաբերական հեղափոխության սկսվելուց ի վեր: Նրանք նաև կարծում են, որ բնականոն էկոլոգիական պայմաններում Համաշխարհային օվկիանոսի մակարդակն անցյալ դարում կբարձրանար յոթ սանտիմետրից ոչ ավելի:

Այժմ մոլորակի վրա միջին ջերմաստիճանը մոտավորապես 1 աստիճանով բարձր է, քան XIX հարյուրամյակի վերջին: