Սիրիան կործմանման եզրին է, պատերազմական հանցագործություններն սպառնալի չափերի են հասնում. ՄԱԿ

Սիրիայում հակամարտության բոլոր կողմերը շարունակում են պատերազմական հանցագործություններ կատարել՝ դիմելով քաղաքների շրջափակման մարտավարությանը և համատարած գնդակոծումներին, ինչպես նաև խոչընդոտելով բնակչությանը մարդասիրական օգնություն հասցնելուն: Ինչպես տեղեկացնում է «Արմենպրես»-ը, այս եզրակացությունն է բովանդակում Սիրիայում մարդու իրավունքների խախտումների հետաքննության հանձնաժողովի նոր զեկույցը, որը փետրվարի 22-ին ներկայացվել է ՄԱԿ-ում:

«Մասնատված սիրիական պետությունը կործանման եզրին է»,- ասած է փաստաթղթում, որի շնորհանդեսը լրագրողների համար անցկացրել է հանձնաժողովի ղեկավար Պաուլու Սերժիու Պինեյրուն: «Հակամարտության մասնակիցների կողմից կատարվող պատերազմական հանցագործություններն սպառնալի չափերի են հասնում»,- նշել է նա:

Պինեյրուն ընդգծել է համատարած գնդակոծումների անհապաղ դադարեցման անհրաժեշտությունը, որոնք, նրա խոսքով, իրականացնում են թե կառավարական զորքերը, թե նրանց դիմակայող զինված խմբերը: Բացի այդ, նա հորդորել է հասնել այն քաղաքների ու շրջանների ապաշրջափակման, որտեղ ընդհանուր առմամբ ավելի քան 400 հազար մարդ է ապրում: «Այդ սպանդը պետք է դադարեցվի»,- հավելել է նա:

30-էջանոց զեկույցում հիմնական ուշադրությունը դարձվում է կառավարամետ ուժերի գործողություններին, ինչպես նաև «Իսլամական պետություն» և «Ջեբհաթ ան Նուսրա» ահաբեկչական խմբավորումների հանցագործություններին, հաղորդել է ՏԱՍՍ գործակալությունը: