Քանզասի Excel Industries գործարանում տեղի ունեցած հրաձգության հետեւանքով կան զոհեր ու վիրավորներ

Առնվազն երեք մարդ է զոհվել, 14-ը՝ վիրավորվել ԱՄՆ-ի Քանզասի նահանգի Excel Industries ձեռնարկությունում տեղի ունեցած հրաձգության հետևանքով: Այդ մասին, ինչպես տեղեկացնում է «Արմենպրես»-ը, փետրվարի 26-ին հաղորդել է Associated Press գործակալությունը՝ վկայակոչելով տեղական ոստիկանության տրամադրած տվյալները:

Ավելի վաղ հաղորդվել էր հրաձգության յոթ հնարավոր զոհի և մինչև 30 վիրավորի մասին: Հարձակվողն սպանվել է ոստիկանների կողմից:

Ինչպես նշել է KWCH հեռուստաալիքը, ականատեսները ճանաչել են հրաձիգին՝ 38-ամյա Սեդրիք Ֆորդին, որը ձեռնարկությունում զբաղվում էր ներկման աշխատանքներով: Տեղեկացվում է, որ Ֆորդը միջադեպից ոչ շատ առաջ Facebook-ի էջում զետեղել է իր լուսանկարները՝ ատրճանակներով և ինքնաձիգով:

Հեռուստաալիքի տվյալներով՝ ենթադրյալ հանցագործը հոգեկան առողջության հետ կապված խնդիրներ է ունեցել և ավելի վաղ ենթարկվել է քրեական պատասխանատվության, այդ թվում՝ կոտրանքով գողության համար, հաղորդել է ՌԻԱ Նովոստին: