Մամուլի միջազգային կոմիտեն Մոգերինիին խնդրել է Բաքվում բարձրացնել մամուլի ազատության հարցը

Մամուլի միջազգային կոմիտեի ղեկավար Ջոել Սայմոնը Եվրամիության փոխնախագահ, արտաքին գործերով եւ անվտանգության քաղաքականության գծով ներկայացուցիչ Ֆեդերիկա Մոգերինիին Ադրբեջան կատարելիք այցի նախօրեին հղած նամակում խնդրել է Բաքվում բարձրացնել մամուլի ազատության հարցը:

Ինչպես հաղորդում է «Արմենպրես»-ը' վկայակոչելով «Թուրան» լրատվական գործակալությունը, նամակում Սայմոնը անհանգստություն է հայտնել Ադրբեջանում ազատ մամուլի ծանր դրությամբ:

«Հիշեցնում եմ ձեզ Ադրբեջանում մամուլի ծանր դրության մասին եւ խնդրում այդ հարցը առաջնային դարձնել Բաքվում ձեր բանակցություններում», -գրել է Սայմոնը:

Հետո նա հիշեցրել է Ադրբեջանում ձերբակալությունների, հետապնդումների եւ ԶԼՄ-ների ու լրագրողների վրա ճնշումների փաստերը, որոնք աննախադեպ բնույթ են ստացել վերջին երկու տարում:

Ադրբեջանում արգելվել է BBC, «Ազատություն» ռադիոկայանների տեղական հաճախականություններով հեռարձակումը: Փակվել են եւ գործունեությունները դադարեցրել մի քանի տեղական ԶԼՄ-ներ, ինչպիսիք են Obyektiv TV-ն, Mediaforum-ը եւ ուրիշներ:

2014 թվականի դեկտեմբերին լրագրողներին անվտանգության սպառնալիքների պատճառով փակվել է Meydan TV օնլայն ռեսուրսի գրասենյակը Բաքվում: Մի քանի լրագրողներ կեղծ մեղադրանքներով ձերբակալվել են:

Ներկայում Ադրբեջանում նվազագույնը 8 լրագրողներ, այդ թվում «Ազատություն» ռադիոկայանի աշխատակից Խադիջա Իսմայիլովան գտնվում են բանտում: Չնայած բազմաթիվ դատավարական խախտումներին եւ ապացույցների բացակայությանը, դատարանները հրաժարվում են բավարարել լրագրողների վճռաբեկ բողոքները:

Անցյալ տարվա դեկտեմբերին Եվրոպայի Խորհրդի գլխավոր քարտուղար Թյուրբերն Յագլանդը հայտարարել է, որ իր գերատեսչությունը Ադրբեջանում մարդու հիմնարար իրավունքների խախտումների հետ կապված պաշտոնական հետաքննություն է սկսել:

«Մենք բարձր ենք գնահատում Մամուլի ազատության միջազգային օրվա առնչությամբ մամուլի ազատությանը ձեր նվիրվածության մասին հայտարարությունը եւ կոչ ենք անում օգտագործել այդ հնարավորությունը, որպեսզի պաշտպան կանգնեք Ադրբեջանում ձերբակալված մեր գործընկերներն: Երկուշաբթի Ադրբեջանի ղեկավարության հետ ձեր հանդիպումներում իշխանություններին կոչ արեք հանդուրժողական մթնոլորտ ստեղծել, ընդգծեք մամուլի ազատության կարեւորությունը եւ այն, որ Ադրբեջանի հետ ԵՄ համագործակցությունը քաղաքացիների ազատ արտահայտվելու հիմնարար իրավունքի ապահովում է ենթադրում, եւ այդ գործում էական քայլ կարող է լինել Ադրբեջանում 8 լրագրոներին անմիջապես եւ անպայման ազատումը բանտից», -ասվում է նամակում: