Ջորջո Արմանին հիասթափված է ժամանակակից դիզայներներից

Իտալացի մոդելագործ և սեփական նորաձևության տան հիմնադիր Ջորջո Արմանին քննադատել է նոր հավաքածուները, որոնք ժամանակակից դիզայներները ցուցադրել են Միլանում կազմակերպված Նորաձևության շաբաթվա շրջանակներում: «Ես ոչ մի նոր բան չտեսա»,- նրա խոսքը մեջբերել է Fashionmag-ը, տեղեկացնում է «Արմենպրես»-ը:

Արմանին կարծում է, որ հարթակների վրա ողջ ներկայացվածը ոճերի խառնուրդ է: «Հասկանալի է, որ, ամեն ինչ խառնելով, մենք մեզ ոչ մի վտանգի չենք ենթարկում»,- ասել է նա և հավելել, որ դիզայներների մեծ մասի համար դժվար է իրենց հավատարիմ մնալ և չտրվել արտաքին ազդեցությանը: «Ես նույնպես գիտեմ, որ դժվար է աշխատել հարափոփոխ աշխարհում: Մենք պետք է հետևենք շուկային, բայց չտրվենք նրան»,- ամփոփել է Արմանին:

Giorgio Armani s.p.a ընկերությունը հիմնադրվել է 1975 թվականին իտալացի մոդելագործ Ջորջո Արմանիի և ձեռնարկատեր Սերջո Գալեոտիի կողմից: Այս բրենդի ներքո վաճառվում է հագուստ, կոշիկ և տղամարդկանց, կանանց ու երեխաների համար նախատեսված աքսեսուարներ, ինչպես նաև ժամացույցներ, զարդեր, կահույք և դեկորի առարկաներ:

Ավելի վաղ նորաձևության ինդուստրիայի քննադատությամբ հանդես է եկել մեկ այլ մոդելագործ՝ Chanel-ի կրեատիվ տնօրեն Կառլ Լագերֆելդը: Նրա դժգոհության առիթ էր դարձել նոր հավաքածուների իրերը դեֆիլեից անմիջապես հետո վաճառելու մի քանի ընկերությունների նախաձեռնությունը: Լագերֆելդն այն կարծիքին է, որ դա կհանգեցնի նորաձևության ինդուստրիայի վախճանին: