Ինչո՞ւ գրողի ծոցը չեք գնում. Facebook-ի օգտատեր

Facebook սոցցանցի օգտատեր Քրիստինե Խանումյանն այսօր գրում է.

«Չեմ ուզում քաղաքականացնել ու չեմ քաղաքականացնում երեկվա պատահարը... էական չի, թե որ ուժի միջոցառման ժամանակ է դեպքը գրանցվել, ուղղակի մի քանի հարցեր, որոնք ունեմ կազմակերպիչներին, ովքեր էլ որ դրանք լինեն.

1. Հելիումը չի կարող վառվել: Եթե վառվել չի կարող, ապա չի կարող վառվել բնականաբար նաեւ ծխախոտից: Հարց, ինչո՞վ են լցված եղել փուչիկները, եթե դրանք պայթել են: Կարեւոր է, որովհետեւ հիմա կարծես ուզում են մի հատ խեղճ ու կրակի վրա գցեն ամենը, յանի անզգուշությամբ ծխախոտից պայթյուն է եղել: Ըստ իս, առաջին հերթին պետք է գտնել նրանց, ովքեր խնայողություն են արել փուչիկների գումարի վրա: Ո՞վ է եղել համերգի կազմակերպման տեխնիկական պատասխանատուն, ո՞վ է եղել պատասխանատուն անվտանգության ապահովման համար, արդյո՞ք այդ մարդիկ տիրապետում են անվտանգության պահպանման տարրրրրրրրրական կանոններին:

2. Ինչո՞ւ դեպքից անմիջապես հետո հաղորդավարներին չեն փոխարիներ բանիմաց մարդիկ, ովքեր բարձրախոսով կկարողանային կառավարել ու ցուցումներ տալ իրենց կորցրած ու խառնված ամբոխին:

3. Ինչո՞ւ համերգը չի դադարեցվել, որի ձայնը խլացնում էր շոկի մեջ հայտնված մարդկանց, ինչո՞ւ պատասխանատվության չեն ենթարկվում հաղորդավարները, ովքեր փորձում էին բեմից հասցնել այն միտքը, թե լուրջ բան չի եղել, համերգը շարունակվում է:

4. Ինչո՞ւ դեպքից անմիջապես հետո չեն բացվել հրապարակը օղակած երկաթյա ճաղավանդակները, որպեսզի մարդկանց շարժման ազատություն տան: Ավելին, իրենք չէին հանում ճաղերը, դեռ մի բան էլ այն հանել փորձող երիտասարդների հետ հայ հայ է կռվի մեջ էին մտնում:

5. Ինչո՞ւ չի դադարեցվել քաղաքական միջոցառումը, անկախ նրանից, թե ում գալստյանն էին սպասում: Ի վերջո, մարդկանց կյանքն ավելի կարեւոր ա, քան որեւէ քաղաքական միջոցառում: Առավել եւս, եթե սա միջոցառում է, որի միջոցով քաղաքական ուժը ցանկանում է էդ մարդկանց քվեները հայցել:

6. Ինչու քաղաքական ուժի ղեկավարը, որը ժամանել էր դեպքի վայր, իր ելույթը չի սկսել դեպքի մասին հիշատակումով, եւ դրանով եզրափակելով միջոցառումը: Այլ փոխարենը ելույթ է ունեցել՝ ասես բան չի եղել, եւ դրանից հետո նոր ուղեւորվել է հիվանդանոց:

7. Ինչո՞ւ գոնե հիվանդանոցում նա խելքը գլխին մի բան չի ասել, չի փորձել իր վրա վերցնել պատասխանատվություն, որը լիդերի պարտականությունն է:

8. Ինչո՞ւ համերգ կոչվածի ավարտից հետո դեպքի վայրում աշխատում էին ոչ թե ոստիկանները, այլ բանվորները' ովքեր ասես ոչինչ չէր եղել, եւ հանգիստ հավաքում էին տեխնիկան:

9. Ինչո՞ւ է այդ ուժին աջակցողների կողմից առաջին իսկ պահից փորձ արվել տարածել այնպիսի տեղեկատվություն, թե լուրջ բան չի եղել' մի երկու հոգի մատները խանձել են ու վերջ:

10. Ինչո՞ւ է նույն մարդկանց կողմից սկզբնական շրջանում անգամ քֆուրի գնով փորձ արվել իջեցնել տուժածների թիվը:

11. Ո՞վ է պատասխանատվություն կրելու այն երեխաների համար, ովքեր բերվել էին իբր համերգի. արդյո՞ք դասատու-տնօրեններն ունեցել են երեխաների ծնողների համաձայնությունը նրանց քաղաքական կազմակերպության միջոցառման տանելու համար:

12. Բոլոր TV-ներով պարբերաբար մեզ կինո-ռեպորտաժներ են ցույց տալիս, թե որքան պատրաստված են մեր ոստիկան-շմոստիկանները: վովիկ գասպարյանը նույնիսկ կինո է նկարել ոստիկանության մասին, որ եւ սեւանի վրա է ցատկում մարդ փրկում, եւ ահաբեկիչներ է կանգնեցնում, եւ այլն եւ այլն: Ինչո՞ւ ոստիկանները տեղում չեն գործել իրենց ուսադիրներին համապատասխան: Չեն փորձել հանգստացնել, օգնել, տարհանել մարդկանց, փոխարենը՝ սառած տոլմաների նման կանգնած նայում էին, թե ինչպես են այդ քաղաքական ուժի երիտկողմնակիցները աջ ու ձախ վազում:

13. Քանի որ միջադեպի ժամանակ տուժել են ՀՀ քաղաքացիներ, ապա ինչո՞ւ են այդ քաղաքական ուժի կողմնակիցները երեկ ողջ օրը այդ հարցի վերաբերյալ տրամաբանական հարցեր տվողներին պատասխանում, թե մարդիկ քաղաքական շահարկումներ են անում: Ինչո՞ւ գոնե հիմա այդ մարդիկ խելքին մոտ հայտարարություններ անելու, ներողություն խնդրելու եւ իրոք բացահայտումներ անելու փոխարեն, նորից արդարացումներ են փնտրում, հայտարարություններ են անում, որոնցով փորձում են կոծկել, պարտակել եւ արդարացնել իրենց արածը: Օրինակ՝ Աշոտյանի երեկվա ստատուսներն ու Հովիկ Աբրահամյանի այսօրվա մեկնաբանությունները:

14. Եւ ի վերջո, եթե այս փոքրիկ միջադեպի պարագայում ի վիճակի չեք գործել նորմալ, պատասխանատվություն վերցնել ու հարցը արագ կարգավորել, ապա էլ ո՞ւմ եք սպասում, ինչո՞ւ գրողի ծոցը չեք գնում:»