Դպրոցականի ֆիլհարմոնիան վերսկսել է գարնանային համերգաշրջանը (լուսանկարներ)

Այսօր պետֆիլհարմոնիայի «Առնո Բաբաջանյան» համերգասրահում տեղի ունեցավ Հայաստանի ազգային նվագարանների պետական նվագախմբի դաս-համերգը, որը վարեց նվագախմբի գեղ. ղեկավար և գլխավոր դիրիժոր, ՀՀ վաստակավոր արտիստ, պրոֆեսոր Նորայր Դավթյանը:

Դպրոցականի ֆիլհարմոնիայի առաքելությունն է՝ խթանել պատանի սերունդների գեղագիտական դաստիարակությունը, նրանց սիրելի ու հասանելի դարձնել դասական և ազգային երաժշտության անկրկնելի գանձարանը:

Կազմակերպվող դաս-համերգների ընթացքում հայտնի երաժիշտները, երաժշտագետները, երգահանները դպրոցահասակ երեխաներին ներկայանում են իբրև բանախոսներ, ներկայացնում ազգային նվագարանները, երաժշտական գործիքները, դրանց ծագումնաբանությունն ու ողջ պատմությունը:

ՀՀ պետական ֆիլհարմոնիայի տնօրեն Գագիկ Մանասյանը կարևորում է դպրոցականի ֆիլհարմոնիայի գործունեությունը և նկատում, որ այն տարիների ընթացքում իր ուրույն տեղն է գտել դպրոցահասակ երեխաներին կրթելու, ազգային նվագարանների հանդեպ սեր արթնացնելու գործում:

Այսօր լեփ-լեցուն դահլիճում ելույթ ունեցավ Հայաստանի ազգային նվագարանների պետական նվագախումբը: Համերգի սկզբում խմբի ղեկավար Նորայր Դավթյանը դիմելով ներկաներին՝ ասաց.

«Առանձնակի շնորհակալություն եմ հայտնում ՀՀ պետական ֆիլհարմոնիայի տնօրեն Գագիկ Մանասյանին, որ այս հրաշալի միջոցառումը կազմակերպել է ձեզ համար: Ինքներս հասկանում ենք, որ սա շատ կարևոր միջոցառում է, քանի որ դուք ծանոթանում եք ազգային ակունքներին, մեր ազզգային մշակույթին, կատարողական արվեստին, նվագարանների ծագումնաբանությանը, ստեղծմանը, զարգացման փուլերին, նաև լսում եք կենդանի կատարումներ և հասկանում, որ մեր ազգային նվագարանները մեր մշակույթի անբաժան մասն են եղել դարեր շարունակ: Մենք պետք է ուրախությամբ պահենք, փայփայենք և փոխանցենք գալիք սերունդներին»: