ՌԴ-ում Հայաստանի դեսպանը Կիմ Բախշիին է հանձնել «Գրիգոր Նարեկացի» հուշամեդալը

Մոսկվայի ազգությունների տանը մարտի 2-ին տեղի ունեցավ գրող, դրամատուրգ, սցենարիստ և հայ ժողովրդի մեծ բարեկամ Կիմ Բախշիի 85-ամյա հոբելյանին նվիրված երեկոն:

Ինչպես տեղեկացնում են ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից, ներկաներին ուղղված իր խոսքում ՌԴ-ում ՀՀ դեսպան Օլեգ Եսայանն անդրադարձավ Կիմ Բախշիի ստեղծագործական գործունեությանը' նշելով, որ իր բացառիկ աշխատանքների և, մասնավորապես, «Արցախի հոգևոր գանձերը» գրքի շնորհիվ Կիմ Բախշին այսօր մեծ հեղինակություն և հարգանք է վայելում Հայաստանում և Արցախում: Դեսպան Եսայանն ընթերցեց ՀՀ նախագահ Սերժ Սարգսյանի՝ Կիմ Բախշիին ուղղված շնորհավորակ ան ուղերձը և հանձնեց ՀՀ մշակույթի նախարար Հասմիկ Պողոսյանի հրամանագրով շնորհված «Գրիգոր Նարեկացի» հուշամեդալը' հայ մշակույթի հանրահռչակման գործում ունեցած նշանակալի ավանդի համար:

Լեռնային Ղարաբաղի ներկայացուցիչ Ալբերտ Անդրյանը ընթերցեց Արցախի նախագահ Բակո Սահակյանի շնորհավորական ուղերձը' ռուսաստանցի գրողին հանձնելով նախագահի հրամանագրով շնորհված «Երախտագիտության» մեդալը:

Երեկոյի ընթացքում շնորհավորական ելույթներով հանդես եկան Ռուսաստանի հայ համայնքային կառույցների ղեկավարներ, ռուսաստանցի գրողներ և հասարակական գործիչներ: Միջոցառումն ուղեկցվեց նաեւ երաժշտական կատարումներով: