Հայաստանը հավակնում է դառնալ հին մեքենաների գերեզմանոց. տնտեսագետ

Փետրվարի 25-ին կառավարությունը որոշեց, որ ԵՏՄ տարածքից ներկրվող ավտոմեքենաների համար 20 տոկոս ԱԱՀ-ն չի գանձվելու: ԵՏՄ ինտեգրման և մակրոտնտեսության հարցերով նախարար Տատյանա Վալովայան էլ ավելի վաղ հայտարարել էր, թե իրենք դժգոհություններ են ստացել այն մասին, որ Հայաստանի իշխանությունները 20 տոկոս ավելացված արժեքի հարկ են գանձում ԵՏՄ երկրներից Հայաստան ավտոմեքենա ներմուծող ֆիզիկական անձանցից:

Տնտեսագետ Արտակ Մանուկյանը ԼՈՒՐԵՐ.com-ի հետ զրույցում նշեց՝ չի կարծում, թե այս որոշումը միտված է Հայաստանի տնտեսության զարգացմանը: «ԵԱՏՄ տարածքի համահարթեցման խնդիրը, որը դրված էր, Հայաստանը չէր կատարում, այդ իսկ պատճառով նման որոշում կայացվեց: Ասել, թե դա տնտեսության զարգացմանն է միտված, առնվազն կոռեկտ չէ: ԵԱՏՄ նախարար Վալովայան սևով սպիտակի վրա գրել էր, որ Հայաստանը խախտում է ձեռք բերված պայմանավորվածությունները: Ավտոմեքենաների ներկրումը տնտեսական աճի հետ որևէ կապ չունի: Եթե նույնիսկ որևէ ազդեցություն ունենա, դա կարող է լինել հարկի տեսքով»,- ասաց տնտեսագետը: Մանուկյանը մեկ կարևոր հանգամանքի վրա ուշադրություն հրավիրեց. 

«Ես ուզում եմ նշել, որ, օրինակ, Վրաստանը ճապոնական մեքենաների ներմուծման արգելք է սահմանել։ Եթե ուսումնասիրում ենք գլոբալ կոնյուկտուրան, ներկայումս եվրոպական երկրները շատ արագ գնում են մեքենաները, օգտագործում, հետո էլի նորը գնում, փոխանակում և այլն: Գլոբալ առումով երկրները ման են գալիս մեքենաների, կոպիտ ասած, գերեզմանոց։ Ստացվում է՝ այն մեքենաները, որոնք տվյալ տարածքում չեն կարող շահագործվել, բնապահպանությանը վնաս են պատճառում, այդ բոլոր մեքենաներն այլ երկրներ են արտահանվում։ Նման միտում կա: Եթե նկատել եք, Հայաստանից մեքենաների արտահանում չկա, միայն ներմուծում է։ Դա խոսում է այն մասին, որ Հայաստանը ևս հավակնում է դառնալ հին մեքենաների գերեզմանոց»։

Մանուկյանի խոսքով՝ սա պայմանավորված չէ կառավարության այս որոշումով: «Եթե գլոբալ վերցնենք, ապա սա մի փոքր գրավիչ է դարձնում ԵԱՏՄ անդամ երկրներից մեքենաներ ներմուծելու գործընթացը: Պետությունը պետք է մտածի, թե ինչպես այդ երևույթից զերծ մնա, քանի որ հին մեքենաների գերեզմանոց դառնալը կարող է բնապահպանական ավելի լուրջ խնդիրներ առաջ բերել: Բայց չեմ կարծում, որ ռուսական մեքենաների նկատմամբ հետաքրքրությունը մեծ կլինի և բոլորը կձգտեն ռուսական մեքենաներ ներկրել»,- հավելեց տնտեսագետը։

Քրիստինա Աղալարյան