Բաշկիրիայում 12 մարդ է զոհվել մասնավոր տներից մեկում տեղի ունեցած հրդեհի հետևանքով

Բաշկիրիայի Ստեռլիտամակ քաղաքում 12 մարդ է զոհվել մասնավոր մեկհարկանի տներից մեկում տեղի ունեցած հրդեհի հետևանքով: Այդ մասին, ինչպես տեղեկացնում է «Արմենպրես»-ը, ՏԱՍՍ-ին հայտնել են հանրապետության ՆԳ նախարարության մամուլի ծառայությունում:

«Պարզվել է, որ այրվել է Տուկաև փողոցի մեկհարկանի սեփական տուն: Բնակարանը պատկանում է Ստեռլիտամակի բնակիչներ 31-ամյա մի տղամարդու և 53-ամյա մի կնոջ: Հրդեհի մարումից հետո տեղում հայտնաբերվել է 12 մարդու՝ երկու կնոջ և տասը տղամարդու դիեր»,-ասել են մամուլի ծառայությունում: Հրդեհից զոհերի մեծ թիվը պայմանավորված է նրանով, որ դրա մասին ուշ է հաղորդվել հրշեջներին:

Զոհվածները Բաշկիրիայի բնակիչներ էին: Այդ մասին ՏԱՍՍ-ին հայտնել է ՌԴ Հետաքննչական կոմիտեի հանրապետական հենաքննչական վարչության ղեկավարի ավագ օգնական Սվետլանա Աբրամովան: «Նրանք տարածաշրջանի բնակիչներ են՝ Սոցիալական ադապտացման կենտրոնից»,- ճշտել է Աբրամովան: Նրա խոսքով՝ առայժմ ստույգ հայտնի չէ, թե նրանք արդյոք առանց բնակության որոշակի վայրի անձինք են: Ենթադրվում է, որ նրանք բոլորը նախկին միութենական հանրապետություններից Ռուսաստան աշխատելու եկած անձինք են: Նրանց ինքնությունը պարզվում է: