Ավելի քան 20 մարդ է զոհվել Նիգերիայի մզկիթներից մեկում իրականացված պայթյունների հետևանքով

Առնվազն 22 մարդ է զոհվել, ևս 17-ը վերքեր են ստացել մարտի 16-ին Նիգերիայի Բոռնո հյուսիսարևելյան նահանգի վարչական կենտրոնի՝ Մայդուղուրի քաղաքի ծայրամասում գտնվող մզկիթում երկու մահապարտ-ահաբեկչուհիների կողմից իրականացված պայթյունների հետևանքով: Այդ մասին, ինչպես տեղեկացնում է «Արմենպրես»-ը, հայտնել Է «Ասոշիեյթեդ պրես» գործակալությունը:

Առայժմ ոչ ոք չի ստանձնել ահաբեկչական գործողության պատասխանատվությունը:

Մայդուղուրիում ավելի քան վեց տարի առաջ իր քայքայիչ գործունեությունն է սկսել «Բոկո հարամ» ծայրահեղական խմբավորումը, որի զինյալները ներկայում հարձակումներ են կատարում ոչ միայն Նիգերիայում, այլև հարևան Նիգերում, Կամերունում և Չադում:

«Բոկո հարամ»-ը ձգտում է ստեղծել իսլամական խալիֆայություն և շարիաթի նորմերը հաստատել Նիգերիայի ամբողջ տարածքում: Այն դեմ է արևմտյան կրթությանը, ժողովրդավարությանն ու իշխանությունների բաժանման սկզբունքին, ինչպես նաև արևմտյան հագուստ կրելուն և օտար մշակույթի բոլոր մյուս դրսևորումներին: 2015 թվականի մարտին խմբավորումը հավատարմության երդում է տվել «Իսլամական պետություն» ահաբեկչական կազմակերպությանը, հաղորդել է ՏԱՍՍ-ը: