ԱԳՆ-ում կայացել է մարդու իրավունքների շուրջ ՀՀ-ԵՄ երկխոսության 7-րդ փուլը

ՀՀ ԱԳՆ-ում մարտի 16-ին տեղի է ունեցել Մարդու իրավունքների շուրջ ՀՀ-ԵՄ երկխոսության 7-րդ փուլը: Ինչպես տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, հայկական պատվիրակությունը գլխավորել է ՀՀ արտաքին գործերի նախարարի տեղակալ Կարեն Նազարյանը, իսկ ԵՄ պատվիրակությունը' Եվրոպական արտաքին գործողությունների ծառայության մարդու իրավունքների ռազմավարության և քաղաքականության իրականացման ստորաբաժանման ղեկավար Էլիզաբեթ Թիզոնը: Նիստին մասնակցել են նաև ՀՀ պետական գերատեսչությունների բարձրաստիճան պաշտոնյաներ և ներկայացուցիչներ:

Երկխոսության ընթացքում քննարկվել են մարդու իրավունքներին վերաբերող մի շարք հարցեր: Ընդգծվել է Հայաստանում մարդու իրավունքների պաշտպանության ու խթանման ոլորտում բարեփոխումների իրականացման գործընթացում արձանագրված առաջընթացը: Այդ համատեքստում հայկական կողմն իր հանձնառությունն է հայտնել շարունակելու երկրում մարդու իրավունքների պաշտպանությանն ապահովմանը ուղղված քայլերը: Հիմք ընդունելով ընդհանուր արժեքները' կողմերն ընդգծել են Հայաստանում բարեփոխումների հետագա խթանման համար ԵՄ աջակցության կարևորությունը:

Հանդիպման օրակարգում են եղել նաև դատաիրավական ոլորտին, ընտրական օրենսդրությանը, երեխաների իրավունքների և գենդերային հավասարությանը, քաղաքական ու քաղաքացիական ազատություններին, քաղաքացիական հասարակության մասնակցությանն առնչվող հարցեր:

Անդրադարձ է կատարվել միջազգային կազմակերպությունների, մասնավորապես, ՄԱԿ-ի, ԵԱՀԿ-ի և Եվրոպայի խորհրդի հետ մարդու իրավունքների պաշտպանության ոլորտում առավել առարկայական համագործակցության հնարավորություններին: