Ճապոնիայում սկսվել է սակուրաների ծաղկման շրջանը

Ճապոնիայում սակուրաների ծաղկումը երկու օր շուտ է սկսել, քան նախորդ տարի: Սակուրան ճապոնական բալենու տեսակ է, որը համարվում է երկրի խորհրդանիշը: ՏԱՍՍ-ը գրում է, որ օդերևութաբանական ազգային ծառայության հաղորդմամբ՝ առաջին ծաղիկները ծառերի վրա հայտնվել են Ֆուկուոկա քաղաքի նույնանուն պրեֆեկտուրայում: 2015-ի համեմատ առավել վաղ ծաղկումը օդերև ութաբանները կապում են Ցելսիուսի սանդղակով 20 աստիճանից բարձր ջերմ եղանակային պայմանների հետ:

Ամեն տարի մարտի սկզբից սակուրաներին մշտապես հետևում են Ճապոնիայի օդերևութաբանական ծառայության տեսուչները: Առաջին 5 ծաղիկների հայտնվելուն պես սկսվում է բնակիչների և զբոսաշրջիկների սիրելի ժամանակաշրջանը: Սակուրայի ամբողջական ծաղկման շրջանը կլինի ապրիլի կեսին, ինչի արդյունքում բոլոր այգիները ուղղակի կխորտակվեն վարդագույնի բոլոր երանգներով ծաղիկների մեջ:

Ճապոնացիները սակուրան համարում են իրենց երկրի խորհրդանիշը, իսկ ծաղիկը ոչ պաշտոնական զինանշանի կարգավիճակ ունի: Բալենու այս ծառատեսակի ծաղկումը ճապոնացիներն ասոցացնում են թեթև տխրության զգացման և գեղեցկության վաղանցիկության հետ: Սակուրաների մասին առաջին հիշատակումները ճապոնական գրականության մեջ կարելի է գտնել դեռ մ. թ. ա. 712 թ.:

Ճապոնիայում հաշվարկվում են սակուրայի 5 հիմնական և 200-ից ոչ պակաս հիբրիդային տեսակներ: