Միջազգային հանրությունը դատապարտել է պայթյունները Բրյուսելում

Միջազգային հանրությունը խստորեն դատապարտել է Բրյուսելում մարտի 22-ին իրականացված հարձակումներն օդանավակայանում և մետրոյում: Ինչպես հաղորդում է «Արմենպրես»-ը, աշխարհի տարբեր երկրների ղեկավարներն ու պաշտոնյաները «Թվիթեր»-ի միկրոբոլգերում իրենց զայրույթն են հայտնել կատարվածի առնչությամբ:

Մեծ Բրիտանիայի վարչապետ Դևիդ Քեմերոնը գրել է. «Ես ցնցված և մտահոգված եմ Բրյուսելում տեղի ունեցող իրադարձությունների առնչությամբ: Մենք կանենք հնարավոր ամեն բան՝ օգնելու համար»:

Եվրախորհրդարանի նախագահ Մարտին Շուլցը հորդորել է բոլորին հետևել Բելգիայի իշխանությունների կարգադրություններին: «Այդ սարսափելի հարձակումներից հետո իմ մտքերը Բրյուսելի և բնակիչների հետ են: Մնացեք ապահով վայրերում, հետևեք իշխանությունների կարգադրություններին»,- ասել է նա:

Լիտվայի վարչապետ Ալգիրդաս Բուտկեվիչյուսը սարսափելի է անվանել Բրյուսելում կատարվածը: «Եթե պայթյուններն ահաբեկչական գործողություն են, մենք խստորեն դատապարտում ենք դա, քանի որ բռնությամբ որևէ քաղաքական նպատակի հասնել հնարավոր չէ»: Իսկ նախագահ Դալիա Գրիբաուսկայտեն համերաշխություն է հայտնել հարձակումներից տուժածներին:

ԵՄ Տրանսպորտի հարցերով հանձնակատար Վիոլետա Բուլչն ընդգծել է, որ ցնցված է կատարվածից՝ հայտնելով, որ իրենք հետևում են իրադարձությունների զարգացմանը:

Լատվիայի արտաքին գործերի նախարար Էդգարս Ռինկևիչը ևս սարսափելի է անվանել զգացողությունը կատարվածից հետո: «Սարսափելի զգացողություն է՝ «ոչ թե եթե, այլ երբ»: Լատվիան Բելգիայի ու Բրյուսելի կողքին է ահաբեկչության դեմ պայքարում»,- նշել է նա:

Վրաստանի նախագահ Գիորգի Մարգվելաշվիլին ևս իր խոսքն է ասել կատարվածի առնչությամբ՝ նշելով. «Ես խորապես ցնցված եմ Բրյուսելի օդանավակայանում տեղի ունեցած ահաբեկչական հարձակման առնչությամբ: Վրաստանի ժողովրդի անունից ես համերաշխություն եմ հայտնում»: