Բակո Սահակյանը սահմանադրական բարեփոխումներին նվիրված խորհրդակցություն է անցկացրել

Արցախի Հանրապետության նախագահ Բակո Սահակյանը մարտի 24-ին հրավիրել է աշխատանքային խորհրդակցություն՝ նվիրված սահմանադրական բարեփոխումներին:

Ինչպես տեղեկացնում են Արցախի Հանրապետության նախագահի աշխատակազմի տեղեկատվության գլխավոր վարչությունից, իր խոսքում նախագահը նշել է, որ ցանկացած պետությունում, մեր երկրում եւս հասարակական հարաբերությունները անընդհատ փոփոխվում են՝ պահանջելով իրավակարգավորման նոր լուծումներ, որոնցից մի մասը առաջացնում են սահմանադրական փոփոխությունների անհրաժեշտություն: «Ցանկացած փոփոխություն կատարելիս պետք է ելնել երկրի անվտանգության, ժողովրդավարության եւ հասարակության համախմբվածության ամրապնդման հրամա յականից: Դա պարտավորեցնում է հանրային եւ պետական շահը վեր դասել ամեն ինչից»,- ընդգծել է Բակո Սահակյանը:

Երկրի ղեկավարը շեշտել է, որ սահմանադրական բարեփոխումների հիմքում պետք է դրվի ժողովրդավարության եւ իրավունքի գերակայության հետագա ամրապնդումը, իշխանության ճյուղերի հավասարակշռումը, պետական կառավարման արդյունավետության բարձրացումը՝ հավելելով, որ անհրաժեշտ է լինելու անել ամեն ինչ' գործընթացը բաց ու թափանցիկ, փոխադարձ հարգանքի մթնոլորտում անցկացնելու համար:

«Արցախի Հանրապետությունում իշխանությունը պատկանում է ժողովրդին, եւ հենց ինքն է որոշում իր ապագան: Մեր ժողովրդի արժեհամակարգը, նրա պատմությունը եւ անցած ուղին, լավատեսությունը եւ սեփական ուժերին ապավինումը թույլ կտան նրան կատարել ճիշտ ընտրություն»,- եզրափակել է Նախագահ Սահակյանը:

Խորհրդակցությանը մասնակցում էին Ազգային ժողովի նախագահ Աշոտ Ղուլյանը, վարչապետ Արայիկ Հարությունյանը, սահմանադրական բարեփոխումների մասնագիտական հանձնաժողովի անդամները, օրենսդիր, գործադիր եւ դատական թեւերի ներկայացուցիչներ: