Ֆրանսիայում առնվազն 12 մարդ է զոհվել ավտովթարի հետևանքով

Ֆրանսիայում լույս մարտի 25-ի գիշերն առնվազն 12 մարդ է զոհվել ճանապարհատրանսպորտային պատահարի հետևանքով, զոհվածների մեծ մասը պորտուգալացիներ են: Այդ մասին, ինչպես տեղեկացնում է «Արմենպրես»-ը, հայտնել է La Montagne թերթը:

Բեռնատարի հետ միկրոավտոբուսի ճակատային բախումը տեղի է ունեցել Օվեռն տարածաշրջանի Ալիե դեպարտամենտում՝ Մուլեն քաղաքի և Մոնբենյի կոմունայի միջև:

«Պորտուգալացիների փոխադրող միկրոավտոբուսը, որոնք հայրենիք էին վերադառնում Շվեյցարիայից, բախվել է հանդիպական բեռնատարին»,- գրում է հրատարակությունը: Ըստ թերթի տեղեկատվության՝ զոհվածների մեջ կա մեկ երեխա:

Միկրոավտոբուսի վարորդը վերքեր է ստացել և տեղափոխվել է հիվանդանոց: Բեռնատարի իտալացի երկու վարորդները թեթև վերքեր են ստացել, բայց ցնցահար վիճակում են: Նրանց խոսքով՝ միկրոավտոբուսը դուրս է եկել երթևեկության հանդիպական գոտի, և իրենք հնարավորություն չեն ունեցել խուսափել բախումից:

Վթարի վայրում աշխատում են փրկարարներն ու ոստիկանությունը, հաղորդել է ՏԱՍՍ-ը: