OPHRD-ն արշավ է սկսել Յունուս ամուսիններին բուժման համար Ադրբեջանից արտասահման դուրս թողնելու պահանջով

Իրավապաշտպանների պաշտպանության դիտարան միջազգային կազմակերպությունը (OPHRD), որը հանդիսանում է Խոշտանգումների դեմ համաշխարհային կազմակերպության (OMCT) եւ Մարդու իրավունքների միջազգաին ֆեդերացիայի (FIDH) համատեղ ծրագիրը, դատապարտված իրավապաշտպաններ Լեյլա եւ Արիֆ Յունուս ամուսինների բուժման համար Ադրբեջանից ելքի թույլտվության պահանջով արշավ է սկսել:

Ինչպես հաղորդում է «Արմենպրես»-ը' վկայակոչելով omct.org կայքը, բոլոր նրանց, ում համար միեւնույն չէ Յունուս ամուսինների ճակատագիրը, առաջարկվում է հանրագիր (պետիցիա) ուղարկել Ադրբեջանի նախագահին, գլխավոր դատախազին, պետական անվտանգության ծառայությանը, արդարադատության նախարարին, ներքին գործերի նախարարին, ՄԱԿ-ում Ադրբեջանի մշտական առաքելությանը' կոչ անելով ապահովել բուժման համար ամուսնական զույգի ելքն արտասահման եւ դադարեցնել նրանց հետապնդումները:

OPHRD-ն ադրբեջանական իշխանություններին կոչ է արել անհապաղ եւ անվերապահորեն վերջ դնել Խաղաղության եւ ժողովրդավարության ինստիտուտի տնօրեն Լեյլա Յունուսի ու ինստիտուտի հակամարտաբանության բաժնի ղեկավար Արիֆ Յունուսի նկատմամբ շարունակվող դատական հետապնդումներին:

Կազմակերպությունն այդ հայտարարությունն արել է այն բանից հետո, երբ Բաքվի վճռաբեկ դատարանը մարտի 11-ին վճիռ է կայացրել մերժել Յունուս ամուսինների' շտապ բուժման համար Գերմանիա մեկնելու թույլտվության խնդրանքը: Ավելի վաղ նման մերժում տվել էր նաեւ Բաքվի Յասամալի շրջանի դատարանը:

Արիֆ Յունուսը տառապում է հիպերտոնիայով, իսկ Լեյլա Յունուսը' հեպատիտով, դիաբետով, պանկրեատիտով եւ լեղաքարային հիվանդությամբ, որոնք սրվել են նրանց ձերբակալությունից հետո: Նրանք երկուսն էլ շտապ վիրահատության եւ բժշկական օգնության կարիք ունեն: Նրանց բժշկական վիճակը հաստատվել է նաեւ Բեռլինի Charite կլինիկայի բժիշկ Քրիստիան Վիտտի կողմից, որը Յունուս ամուսիններին այցելել էր բանտում եւ նրանց պայմանական ազատումից հետո: Վիտտը հաստատել էր նրանց առողջական վիճակի վատթարացումը: Յունուս զույգը կարող է շտապ եւ կենսականորեն անհրաժեշտ բուժում ստանալ Charite հիվանդանոցում:

Լեյլա եւ Արիֆ Յունուսները 2015 թվականի օգոստոսի 13-ին ծանր հանցագործությունների դատարանի կողմից դատապարտվել են համապատասխանաբար 8,5 եւ 7 տարի ժամկետով ազատազրկման' դատարանի կողմից կոպտորեն խախտելով միջազգային չափանիշները եւ պատշաճ դատական գործընթացը: 2015 թվականի դեկտեմբերի 9-ին նրանց պայմանական ազատ են արձակել 5 տարի փորձնական ժամկետով:

Երկու իրավապաշտպաններն էլ ձերբակալվել էին իշխանություններին քննադատելու եւ հասարակական գործունեության համար:

Ադրբեջանում Լեյլա Յունուսը եւ նրա ամուսին Արիֆ Յունուսը մեղադրվում են նաեւ, իբր, Հայաստանի օգտին լրտեսություն անելու մեջ, սակայն, նրանց հետապնդելու իրական պատճառը Ադրբեջանում առկա 100-ից ավելի քաղաքական բանտարկյալների խնդրի ակտուալացումն ու միջազգային կազմակերպություններին արված' Բաքվում 2015 թվականի մայիսին անցկացված Եվրոպական խաղերը բոյկոտելու մասին կոչերն են: Amnesty International կազմակերպությունը Լեյլա եւ Արիֆ Յունուսներին «խղճի բանտարկյալներ» է ճանաչել: