ՀՀԲ-ին հաջողվել է «կոտրանքի» ենթարկել Սան Բեռնարդինոյի հրաձիգի iPhone-ը

Հետաքննությունների համերկրային բյուրոյի (ՀՀԲ) աշխատակիցները կարողացել են «կոտրանքի» ենթարկել այն iPhone ձեռքի հեռախոսը, որը պատկանում էր Կալիֆոռնիայի Սան Բեռնարդինո քաղաքում (ԱՄՆ) խաղաղ բնակիչների վրա հարձակման մասնակից Սայիդ Ֆարուքին: Այդ մասին, ինչպես տեղեկացնում է «Արմենպրես»-ը, մարտի 29-ին հայտնել է Մեծ Բրիտանիայի BBC հեռուստառադիոկորպորացիան:

Առայժմ չի հաղորդվում, թե ՀՀԲ-ն հատկապես ինչպես է կարողացել տեղեկատվությունն ստանալու հնարավորություն ունենալ: Սակայն արդեն հայտնի է, որ դրանով սմարթֆոնն արտադրողի՝ Apple ընկերության հետ աղմկահարույց դատաքննությունը կավարտվի:

Ավելի վաղ դատարանը ՀՀԲ-ի խնդրանքով ընկերությանը պարտավորեցրել էր մշակել ծրագրային ապահովում, որն օգներ արգելազերծելու ձերբակալելիս գնդակահարված Ֆարուքի հեռախոսը: Դա բացատրել են այն բանով, որ հեռախոսը կարող է կարևոր տեղեկատվություն պարունակել քննիչների համար:

Սակայն Apple-ը հրաժարվել է կատարել դատարանի վճիռը և այն գանգատարկել է վերադաս ատյանում: Ընկերությունում հայտարարել են, որ նման գործողությունները համարում են սպասարկյալների իրավունքների խախտում: IT-ընկերություններից շատերը նրան պաշտպանել են:

Սայիդ Ֆարուքը և նրա կինը՝ Թաշֆին Մալիքը, անցյալ տարվա դեկտեմբերի 3-ին հրաձգություն են իրականացրել Միացյալ Նահանգների Սան Բեռնարդինո քաղաքում: Դրա հետևանքով զոհվել է 14 անզեն մարդ: Ամուսիններն իրենք սպանվել են ոստիկանության կողմից, հաղորդել է «Ինտերֆաքս»-ը: