Երկու շրջան կսնուցվի իրանական գազով. Յոլյանի չգիտի, թե ինչքան կլինի իրանական գազի գինը

Իրանի Իսլամական Հանրապետության աջակցությամբ իրականացվող՝ Հայաստանում՝ Իրանի հետ սահմանամերձ բնակավայրերի գազի բաշխման ցանցի կառուցման դրամաշնորհային ծրագրի իրականացման գլխավոր կապալառու իրանական «Սաներջի» ընկերությանն այսօր կառավարությունը թույլատրեց իրականացնել օրենքով նախատեսված լիցենզավորման ենթակա քաղաքաշինության բնագավառում շինարարության իրականացման (էներգետիկ) գործունեություն:

ԼՈւՐԵՐ.com-ի տեղեկացմամբ՝ ՀՀ էներգետիկայի և բնական պաշարների նախարար Լևոն Յոլյանն այսօր նիստից հետո լրագրողների հետ զրույցում ասաց, որ ծրագրով այդ երկու համայնքում գազը կստանան Իրանից:

Հարցին, թե քանի՞ խորանարդ մետր տարեկան գազ կտրամադրվի այդ համայնքներին, նախարարն ասաց, որ սպառումից է կախված, և երբ ծրագիրն իրականանա, պարզ կլինի, թե այդ երկու համայնքներում ինչքան գազ է սպառվում:

Թե այդ երկու շրջանի համար իրանական գազի գինը որքա՞ն է կազմելու, նախարարը պատասխանեց.

«Շինարարարությունը թող ավարտվի, դուք տեսնում եք՝ ամեն ինչ դինամիկ պրոցեսի մեջ է՝ և՛ ռուսական կողմի հետ, և՛ Իրանի հետ: Ընդամենը երկու համայնքի համար գազի բաշխիչ ցանցի կառուցում է իրականացվում: Դա նշանակում է, որ շինարարություն է արվում, որ գազամուղից մինչև բնակչին հասնի գազը: Գինը չգիտեմ՝ ինչքան է»,- ասաց Յոլյանը:

Դիտարկմանը, թե հնարավո՞ր է նաև թանկ լինի, նախարարն ասաց. «Եթե թանկ լինի, բնակիչն ինքը կարող է որոշում կայացնել: Մինչև հիմա առանց գազի ի՞նչ է անում: Ինքը որոշում կկարողանա կայացնել՝ սպառե՞լ այդ գազը, օգտագործե՞լ, թե՞ ոչ»: