Քիմ Քարդաշյանը տեղափոխվել է Լոս Անջելեսի «պլատինե եռանկյունի»

Հեռուստաաստղ Քիմ Քարդաշյանը և նրա ամուսինը՝ Քանիե Ուեսթը, աստղային ընտանիքը գլխավորող Քրիս Ջենների կալիֆոռնիական տնից տեղափոխվել են սեփական առանձնատուն: Աստղային զույգի տունը գտնվում է Լոս Անջելեսի Բել Էյր հեղինակավոր շրջանում: Այդ մասին, ինչպես տեղեկացնում է «Արմենպրես»-ը, գրել է ամերիկյան People հանդեսը:

Զույգն առանձնատունը 2013 թվականին գնել էր 11 մլն դոլարով: Անցյալ տարվա ընթացքում ամուսնական զույգն ապարդյուն փորձում էր այն վաճառել, բայց հետո որոշեց բնակություն հաստատել այնտեղ:

Սակայն այդ տունը ժամանակավոր ապաստարան կդառնա աստղային զույգի համար: 2014 թվականին Քիմը և Քանիեն 20 մլն դոլարով առանձնատուն են ձեռք բերել Հիդեն Հիլսում՝ Լոս Անջելեսի արվարձանում, որտեղ նրանք պլանավորում են մեծացնել իրենց դստերն ու որդուն:

«Երբ մենք անշարժ գույք էինք գնում Բել Էյրում, մենք երկուսով էինք: Երեխաների ծնվելուց հետո հասկացանք, որ մեզ միանգամայն այլ բնակտարածք է հարկավոր»,-Քիմ Քարդաշյանի խոսքը մեջբերում է հրատարակությունը:

Հիդեն Հիլսի կալվածքն զբաղեցնում է 1,4 հեկտար տարածք: Այստեղ կա երկու լողավազան, ՍՊԱ-ի երկու գոտի, սեփական խաղողի այգի: Ամուսիններն այստեղ կտեղափոխվեն, երբ ավարտվի ծավալուն վերանորոգումը:

Բել Էյրը, Բևեռլի Հիլզը և Հոլմբի Հիլզը կազմում են Լոս Անջելեսի այսպես կոչված «պլատինե եռանկյունին»: Շրջանի մասնավոր առանձնատներում ապրում են աշխարհի ամենահարուստ մարդիկ և Հոլիվուդի աստղերը: