Առողջապահության համաշխարհային կազմակերպության փորձագետները ժամանել են Հայաստան

Հակամանրէային դեղերի նկատմամբ (ՀՄԴ) կայունության պլանային ախտորոշիչ համաճարակաբանական հսկողության մեխանիզմների ապացուցման նպատակով կազմակերպվող հետազոտության (PoP-study) նախապատրաստական աշխատանքներն իրականացնելու համար Հայաստան են ժամանել Առողջապահության համաշխարհային կազմակերպության (ԱՀԿ) եվրոպական գրասենյակի միջազգային փորձագետներ: Այս մասին տեղեկացնում են ՀՀ առողջապահության նախարարությունից:

Նախապատրաստական աշխատանքներն իրականացնելու նպատակով միջազգային փորձագետները ՀՀ ԱՆ ՀՄԴ նկատմամբ կայունության դեմ պայքարի հարցերով համակարգող Քրիստինե Գյուրջյանի և այլ մասնագետների ուղեկցությամբ այցելել են բժշկական օգնություն և սապասարկում իրականացնող հաստատություններ և ՀՀ ԱՆ Հիվանդությունների վերահսկման և կանխարգելման ազգային կենտրոնի «Ռեֆերենս լաբորատոր կենտրոն» մասնաճյուղ:

Հետազոտության նպատակն է ձևավորել ՀՄԴ նկատմամբ կայունության հսկողության համակարգ, բժիշկների շրջանում կարևորել արյան վարակների ախտորոշման, բուժման հարցում կլինիկական մանրէաբանության նշանակությունը և զարգացնել ռեֆերենս լաբորատորիայի' ՀՄԴ նկատմամբ կայունության հետազոտման կարողություններն ու կադրային ներուժը: Հետազոտությունը կնպաստի արյան վարակների վաղ ախտորոշման և հակամանրէային դեղերով նպատակային բուժման գործընթացի կարգավորմանը, արյան նմուշառման, նմուշի պահպանման, տեղափոխման գործընթացների, միկրոկենսաբանական լաբորատոր հետազոտությունների' ներկայացվող պահանջներին համապատասխան որակի ապահովմանը, ինչպես նաև ՀՄԴ նկատմամբ կայունության համաճարակաբանական հսկողության համակարգում ներգրավված մասնագետների հետ համագործակցությանը:

Նշենք, որ երկօրյա աշխատանքների արդյունքներն ամփոփելուց հետո կմեկնարկի հակամանրէային դեղերի նկատմամբ (ՀՄԴ) կայունության պլանային ախտորոշիչ համաճարակաբանական հսկողության մեխանիզմների ապացուցման նպատակով հետազոտությունը: