Էրդողանը ցավակցել է Ալիևին՝ ԼՂՀ հետ սահմանում ռազմական կորուստների համար

Վաշինգտոնում գտնվող Թուրքիայի նախագահ Թայիփ Էրդողանը հեռախոսով ցավակցություն է հայտնել Ադրբեջանի նախագահ Իլհամ Ալիևին՝ այսօր ԼՂՀ հետ Ադրբեջանի հակամարտ զորքերի շփման գծում ադրբեջանական կողմի սկսած ռազմական գործողությունների արդյունքում ունեցած մարդկային և տեխնիկայի մեծ կորուստների համար:

Այս մասին, ինչպես հաղորդում է «Արմենպրես»-ը, հայտնում է «Անատոլու» լրատվական գործակալությունը' նշելով, որ Էրդողանը Ալիևին ցավակցություն է հայտնել անձամբ իր, թուրք ժողովրդի անունից՝ Ալլահի կողմից, և վիրավորներին արագ ապաքինում ցանկացել:

Իր հերթին Ադրբեջանի արտգործնախարար Էլմար Մամեդյարովին մեծ թվով զինծառայողների կորստի համար ցավակցություն է հայտնել նաև Թուրքիայի նրա պաշտոնակից Մևլյութ Չավուշօղլուն:

Ադրբեջանական կողմը հայտնել էր 12 զինծառայող և մեկ տանկ կորցնելու, բայց ոչ մի վիրավոր չունենալու մասին:

ԼՂՀ ՊԲ լրատվական ծառայությունից ավելի վաղ հայտնել էին, որ ընդհանուր առմամբ, ապրիլի 1-ի լույս 2-ի գիշերը և օրվա ընթացքում տեղի ունեցած մարտական գործողությունների ընթացքում ադրբեջանական զինուժը տվել է 200-ից ավելի կորուստ: Միայն Թալիշի ուղղությամբ ոչնչացվել է ադրբեջանական հատուկ նշանակության ջոկատի առնվազն 20 զինվոր, Մարտակերտի ուղղությամբ' 2 տանկ, 2 անօդաչու թռչող սարք, իսկ հյուսիսային ուղղությամբ' 1 ուղղաթիռ: Հակառակորդը հարձակման թիրախ է դարձրել ոչ միայն ՊԲ բանակի դիրքերը, այլև՝ խորը թիկունքում գտնվող խաղաղ բնակավայրեր ը: Այս ուղղությամբ ՊԲ հակաիդայինների կողմից խոցվել է թշնամական մեկ ռազմական ուղղաթիռ և 2 տանկ: