Ադրբեջանական մամուլը հաստատել է ԼՂՀ հետ սահմանամերձ շրջաններից բնակչության փախուստը (տեսանյութ)

Թարթառի բնակիչները անմիջապես փախուստի են դիմել Ադրբեջանի ԶՈւ կողմից ԼՂՀ-ի դեմ ապրիլի 1-ի լույս 2-ի գիշերը սկսված ռազմական գործողություններին հայկական կողմից պատասխան հարվածներ հասցվելուց հետո:

Ինչպես հաղորդում է «Արմենպրես»-ը, այս մասին պատմում են Թարթառից Բարդա փախած քաղաքացիները' ադրբեջանական Meydan TV ինտերնետային կայքի տարածած տեսանյութում:

Նրանք պատմում են, որ թեժ մարտերի հետևանքով Թարթառի բնակիչները լքել են բնակավայրը և ուղևորվել այլ քաղաքներ: Նրանց խոսքով' փոխհրաձգությունը սկսվել է ժամը 03:30-ին և շարունակվել մինչև առավոտ:

Թարթառի բնակիչ Գյուլար Ալիևայի խոսքով՝ ժամը 3-ին սկսված փոխգնդակոծությունների ձայները չեն դադարել մինչև առավոտ:

«Մենք Թարթառից կարողացանք դուրս գալ ժամը 10-ին: Փոխադարձ գնդակոծությունները շարունակվել են մեր դուրս գալուց հետո ևս: Տներին դիպչած գնդակներից վիրավորներ չեն եղել, բայց տներին վնաս է հասցվել»,- ասել է նա:

Թարթառի մյուս բնակիչ Քիֆայաթ Գուլիևան պատմում է, որ իրենց փախուստի պատճառը թեժ փոխադարձ գնդակոծություններն են եղել:

«Ականները դիպչում էին տներին, դռներին: Մենք խիստ սարսափած ենք»,- ասել է նա:

Նշենք, որ ադրբեջանական կողմը հերքել է ԼՂՀ-ի սահմանամերձ շրջաններից բնակչության դուրս գալու մասին սեփական մամուլում տարածված լուրերը: Ավելին, Թարթառի և Աղդամի գործադիր ղեկավարները ձայն-ձայնի տված լրագրողներին «հավաստիացրել» էին, որ բնակչությունը «հանգիստ զբաղված է գյուղատնտեսական և առօրյա գործերով»: