Ադրբեջանն ավելի շատ պատճառներ ունի հրադադարը խախտելու համար. Թոմաս դե Վաալ

Լեռնային Ղարաբաղում մարտերի վերսկսումը վտանգավոր է ողջ տարածաշրջանի համար: Ինչպես հաղորդում է «Արմենպրես»-ը, carnegie.ru-ում հրապարակած իր հոդվածում նման կարծիք է հայտնել փորձագետ Թոմաս դե Վաալը: «Ղարաբաղյան հակամարտությունը «սառեցված» չէ, ինչպես շատերը հաճախ ասում են: 1994թ. հրադադարը պահպանվում էր զսպվածության և Հայաստանի ու Ադրբեջանի ղեկավարների հաշվարկների շնորհիվ»,- նշում է դե Վաալը: Փորձագետը շեշտում է նաև, որ վերջին տարիներին Ադրբեջանի կողմից միլիարդավոր նավթադոլարներն օգտագործվել են զենքի ձեռքբերման համար, իսկ Հայաստանը պահպանել է հավասարակշռությունը Ռուսաստանի հետ ունեցած իր դաշինքի շնորհիվ: «Հակամարտության գոտում կա ծանր զրահատեխնիկա, շուրջ 20000 մարդ երկու կողմերց և ընդամենը մի քանի անզեն ԵԱՀԿ դիտորդներ, ուստի նման մարտերի վերսկսման հնարավորությունը երբեք ավելի մեծ չէր եղել»,- գրում է դե Վաալը: Փորձագետը միաժամանակ ընդգծում է, որ ադրբեջանական կողմն ավելի շատ պատճառներ ունի հրադադարը խախտելու համար: «Որպես հակամարտությունում պարտված կողմ Բաքուն գիտակցում է, որ Հայաստանի նկատմամբ իր միակ ճնշման գործիքը հրադադարի խախտումներն են, որոնք հիշեցնում են ստատուս-քվոյի անընդունելիության մասին»,- նշում է ամերիկացի փորձագետը: