«Ազատ դեմոկրատներ» կուսակցությունը միջազգային հանրությանը կոչ է անում հասցեական գնահատական տալ Ադրբեջանի քայլերին

«Ազատ դեմոկրատներ» կուսակցությունը ԵԱՀԿ Մինսկի խմբին և միջազգային հանրությանը կոչ է անում վերջ դնել Ադրբեջանի սանձարձակ գործողություններին և կողմերի միջև հավասարության նշան դնող հայտարարություններից անցնել հասցեական գնահատականների: Կուսակցությունը հայտարարություն է տարածել, որում անդրադարձել է վերջին օրերին Ադրբեջանի կողմից իրականացվող սադրիչ գործողություններին և դրա հնարավոր հետևանքներին:

«Արդեն երկու օր է՝ Ադրբեջանը Լեռնային Ղարաբաղի խաղաղ բնակչության նկատմամբ իրականացնում է ակնհայտ ռազմական գործողություններ՝ օգտագործելով հրետանի, զրահատեխնիկա և օդուժ։ Ու թեև ժամեր առաջ ադրբեջանական կողմը հայտարարել է, թե միակողմանի դադարեցնում է կրակը, սակայն իրականում շարունակվում են ադրբեջանական սադրիչ ռազմական գործողությունները և հրետակոծությունը Լեռնային Ղարաբաղի խաղաղ բնակավայրերի նկատմամբ։ Ազատ դեմոկրատներ կուսակցությունը կոչ է անում Մինսկի խմբի համանախագահներին, միջազգային կառույցներին և քաղաքակիրթ աշխարհին , կող մերի միջև հավասարության նշան դնող հայտարարություններից ու կոչերից անցնել հասցեական գնահատականների և մշակել կոնկրետ գործողությունների պլան՝ Ադրբեջանի սանձարձակ պատերազմական գործողություններին վերջ դնելու համար։ Այլապես, ռազմական գործողությունները կտարածվեն ամբողջ տարածաշրջանով, որն էլ հղի է մոլորակի վրա մի նոր թեժ կետի առաջացմամբ՝ իր բոլոր վտանգավոր հետևանքներով։ Ազատ դեմոկրատներ կուսակցության լրատվական ծառայություն»: