ԿԺԴՀ-ն պատժամիջոցների հետևանքով ստեղծված իրադրությունը համեմատել է Լենինգրադի շրջափակման հետ

Հյուսիսային Կորեայի դեմ սահմանված միջազգային պատժամիջոցներն իրենց հետևանքներով գերազանցում են Լենինգրադի շրջափակումը Հայրենական Մեծ պատերազմի ժամանակ: Այդ մասին, ինչպես տեղեկացնում է «Արմենպրես»-ը, հայտնել է Կորեայի կենտրոնական հեռագրական գործակալությունը՝ հղում անելով ԿԺԴՀ-ի Պաշտպանության պետական կոմիտեի հայտարարությանը:

«ԿԺԴՀ-ն խեղդելու ԱՄՆ-ի և թշնամական մյուս ուժերի փորձերը հասել են աննախադեպ աստիճանի»,- հայտարարել են Փենյանում: «Լենինգրադի շրջափակումը, որը սարսափ էր առաջացնում մարդկանց սրտերում որպես պատերազմների համաշխարհային պատմության մեջ ամենադաժան պատժամիջոցների դրսևորում, և սառը պատերազմի ժամանակների Կարիբյան ճգնաժամը, հազիվ թե կարող են համեմատվել ներկայում Կորեական թերակղզում ստեղծված իրադրության հետ»,- նշել են ՊՊԿ-ում:

Պաշտպանության պետական կոմիտեի ներկայացուցիչը հայտարարել է, որ Փենյանը ցանկացած պահի կարող է միջուկային հարված հասցնել ԱՄՆ-ի մայրցամաքային մասին:

Մարտի 30-ին հայտնի է դարձել, որ Հյուսիսային Կորեայի կառավարությունը քաղաքացիներին նախազգուշացրել է երկրի տնտեսության մեջ վերահաս դժվարին ժամանակների մասին՝ կոչ անելով բնակչությանը՝ պատրաստ լինել սովին: Հարավկորեական ԶԼՄ-ների տվյալներով՝ իշխանությունները պարտավորեցրել են բնակչությանն ամսական մեկական կիլոգրամ բրինձ բերել պետական պահեստներ:

Տնտեսական ծանր իրադրությունը կարող է դառնալ Հյուսիսային Կորեայի դեմ սահմանված աննախադեպ խիստ պատժամիջոցների հետևանքը, որոնք ՄԱԿ-ի Անվտանգության խորհուրդն ընդունել Է ի պատասխան Փենյանի կողմից ջրածնային ռումբի փորձարկման և հեռահար հրթիռների արձակումների: