Հայաստանի կառավարությունը չի հաստատում Մեդվեդևի այցի ծրագրի փոփոխության հետ կապված տեղեկությունը

Ռուսաստանի Դաշնության վարչապետ Դմիտրի Մեդվեդևի՝ Երևան կայանալիք այցի ծրագրում փոփոխություն չկա: ՀՀ վարչապետի մամուլի քարտուղար Գոհար Պողոսյանն «Արմենպրես»-ի հետ զրույցում նշեց. «Այս պահի դրությամբ այցի ծրագրում որևէ փոփոխություն չկա»:

ՌԴ կառավարության պաշտոնական կայքում այցի օրակարգի հետ կապված ևս որևէ փոփոխություն չկա. ավելի վաղ տեղադրված հաղորդագրությունը Մեդվեդևի այցի մասին ՌԴ գործադիր իշխանության կայքում է անփոփոխ:

Նախատեսվում է, որ Մեդվեդևը Երևան կատարելիք այցի ընթացքում, բացի երկկողմ հանդիպումներից և հարաբերությունների լայն սպեկտրի քննարկումից, պետք է մասնակցի նաև Եվրասիական միջկառավարական խորհրդի նիստին:

Ավելի վաղ տեղեկություններ էին տարածվել նաև Եվրասիական միջկառավարական խորհրդի՝ Երևանում կայանալիք նիստի հետաձգման մասին: «Արմենպրես»-ի հետ զրույցում Եվրասիական տնտեսական կոլեգիայի մամուլի ծառայությունից նշեցին, որ այս մասին դեռևս որևէ տեղեկություն չկա: