Մեր ծրագրերի մաս է կազմում նաև հայրենական ռազմական արդյունաբերության զարգացումը. Սեյրան Օհանյան

Վերջին օրերին Արցախում Ադրբեջանի ագրեսիան ռազմական տեսանկյունից աննախադեպ էր: Ազգային ժողովում կառավարության հետ հարցուպատասխանի ժամանակ այս մասին ասաց ՀՀ պաշտպանության նախարար Սեյրան Օհանյանը՝ պատասխանելով ՕԵԿ խմբակցության քարտուղար Մհեր Շահգելդյանի հարցին: «Աննախադեպ էր այն առումով, որ Ադրբեջանը կիրառում էր նոր սպառազինություն, ինչպես նաև ներգրավել էր տարբեր վարձկան ահաբեկիչների: Միևնույն ժամանակ, հասկանալի է ու ակնհայտ, որ մենք պաշտպանության բանակի շնորհիվ կարողացանք հաջողություններ արձանագրել այսօր մեր ձեռքի տակ ունեցած սպառազինության և ռազմական տեխնիկայի ճշգրիտ կիրառման, դրա նկատմամբ հոգատարության արդյունքում»,- «Արմենպրես»-ի հաղորդմամբ՝ նշեց Օհանյանը:

Նրա խոսքով՝ հասկանալի է, որ հայկական կողմը քանակական առումով որոշակիորեն զիջում է: «Բայց վերջին տարիների մեր կատարած աշխատանքը բերել է նրան, որ մենք անցել ենք զինված ուժերի զարգացման երկրորդ ժամանակահատվածին, որի շրջանակներում մենք իրականացնում ենք սպառազինության և զինտեխնիկայի արդիականացման 2016-2020թթ ծրագիրը, որի մաս է կազմում սեփական ռազմական արդյունաբերության զարգացումը: Մշակված է հայեցակարգ, որը քննարկվել է տարբեր օղակներում, ստեղծվել է ռազմական արդյունաբերության կոմիտեն, և այդ աշխատանքներն իրականացվում են»,- ընդգծեց նախարարը:

Նրա խոսքով՝ կան համապատասխան ծրագրային բյուջետային հատկացումներ, որի հիմնական նպատակը հայրենի սպառազինության արտադրության մեջ նոր տեխնոլոգիաների ընտրությունն է: «Բոլոր այն ուղղություններում, որտեղ հակառակորդը ունի առավելություններ, մենք ունենք համապատասխան մշակած տեխնոլոգիաներ և աշխատանքներ ենք իրականացնում: Ամեն ինչ առաջին հերթին կախված է մեր հնարավորություններից»,- ասաց Օհանյանը:

Սեյրան Օհանյանը հավելեց, որ հայկական բանակը պետք է կատարելագործի իր հնարավորությունները՝ հակառակորդի ագրեսիայի դիմակայելու համար, ինչի համար շատ կարևոր է ժամանակակից տեխնոլոգիաների օգտագործումը: «Մենք պետք է ժամանակակից սպառազինություն և ռազմական տեխնիկա ձեռք բերենք : Ի դեպ, ասեմ հետևյալը, որ առկա մեր ուժերով և հնարավորություններով, բոլոր տիպի կրակային միջոցների ճիշտ օգտագործումն է հնարավորություն տվել դիմակայել հակառակորդին»,- եզրափակեց նախարարը: