ԵԱՏՄ-ից ներկրվող մեքենաներից ԱԱՀ գանձման որևէ դեպք այլևս չի գրանցվում. ՊԵԿ փոխնախագահ

Եվրասիական տնտեսական միության տարածքից ֆիզիկական անձանց կողմից ներկրվող ավտոմեքենաներից արդեն երկու օր է, ինչ ԱԱՀ չի գանձնվում: «Արմենպրես»-ի փոխանցմամբ' այս մասին լրագրողների հետ զրույցում հայտարարեց ՊԵԿ-ի նախագահի տեղակալ Վախթանգ Միրումյանը' նշելով, որ «Ավելացված արժեքի հարկի մասին» ՀՀ օրենքում փոփոխություններ և լրացումներ կատարելու մասին օրենքն ուժի մեջ է մտել երկու օր առաջ: «Հիմա չեք կարող գտնել մի դեպք, որ ներմուծված ավտոմեքենայի մասով ավելացված արժեքի հարկ գանձվի: Ներմուծման պահը ՀՀ սահմանը հատելու պահն է»,-ասաց Միրումյանը:

Հարցին ի պատասխան, թե դրա արդյունքում որքանով կնվազեն բյուջե մուտքերը' Միրումյանն ասաց, որ դա կախված է նրանից, թե երրորդ երկրներից ավտոմեքենաների ներմուծումը որքանով կփոխարինվի ԵԱՏՄ ապրանքների ներմուծումով: ՊԵԿ նախագահի տեղակալը կրկին շեշտեց, որ օրենքը հետվերադարձի մեխանիզմ չի նախատեսում: