«Արցախն ուժեղ է». Լոս Անջելեսի հայերը բողոքի ցույց են անցկացրել Ադրբեջանի հյուպատոսության առջև

Լոս Անջելեսի հայ համայնքի շուրջ 3500 ներկայացուցիչներ, հետևելով Հայկական երիտասարդական ֆեդերացիայի կոչին, դուրս էին եկել բողոքի ցույցի' ընդդեմ Արցախի դեմ Ադրբեջանի սանձազերծված ագրեսիայի: Ինչպես հաղորդում է asbarez.com-ը, ցուցարարներն անցել են կենտրոնական Վիլշիր և Գրանվիլ պողոտաներով' վանկարկելով «Ոչ մի թիզ», «Արցախն ուժեղ է» և հասել մինչև Լոս Անջելես ում Ադրբեջանի հյուպատոսություն:

Ցուցարարները նաև մեկ րոպե լռությամբ հարգել են Արցախում զոհված զինծառայողների և քաղաքացիական անձանց հիշատակը' բարձրաձայն կարդալով նրանց բոլորի անունները:

Ցույցի կազմակերպիչներից Արենի Համբարյանն իր ելույթում նշել է, որ քանի դեռ կենսական սպառնալիք կա Արցախիկամ հայկական որևէ այլ հողակտորի նկատմամբ, հայերը պետք է շարունակեն իրենց աննկուն պայքարը:

Հայկական երիտասարդական ֆեդերացիայի ներկայացուցիչներից Դավիթ Առաքելյանն էլ հայտարարել է, որ «Մեր զինվորների հետ» արշավի շրջանակներում Լոս Անջելեսի հայ համայնքը օժանդակություն կտրամադրի հայ զինծառայողների, և մասնավորապես Արցախում զոհվածների ընտանիքներին:

Ամերիկահայերի ցույցին անդրադարձ են կատարել մի շարք ամերիկյան լրատվամիջոցներ, այդ թվում NBC-ն: