Ես հավաստիացնում եմ ձեզ, որ կնիքի նյութն իմ անձնագրում դեռ առկա է. Տիգրան Մուկուչյան

ԿԸՀ նախագահ Տիգրան Մուկուչյանն այսօր լրագրողների հետ զրույցում նշեց, որ այսօր ԿԸՀ-ի կողմից հրապարակած համամասնական ընտրակարգով ընտրությունների նախնական արդյունքներոմ ներառված չեն արտերկրում էլեկտրոնային քվեարկության թվերը, բայց դրանք փոքր մեծություններ են: 

Նա նաև չցանկացավ գնահատել ընտրությունների արդյունքները, քանի որ այսօր դիմում-բողոքների ընդունման գործընթացը պետք է ավարտվի: Մուկուչյանը խոստացավ վաղը կամ մյուս օրն այս բոլոր հարցերին պատասխանել ասուլիսի ընթացքում:

Անդրադառնալով թանաքների ցնդման հարցին՝ Մուկուչյանը անհասկանալի համարեց այն, թե որտեղից էին նախորդ օրը տարածվել կնիքի թանաքը ժամանակից շուտ ցնդելու մասին լուրերը, և շեշտեց, որ առաջարկել էր բոլորին գալ ու ստուգել: «Ես հավաստիացնում եմ ձեզ, որ կնիքի նյութն իմ անձնագրում դեռ առկա է»,- նշեց Մուկուչյանը՝ հավելելով, որ հանրապետությունում առկա են եղել բազմաթիվ ընտրատարածքներ, որոնցում նման խնդիր ընդհանրապես չի առաջացել:

Տիգրան Մուկուչյանը նշեց, որ ԿԸՀ ստացված դիմում-բողոքները եղել են 3-ը. «Մեկը ներկայացվել է պատգամավոր Գալուստ Սահակյանի կողմից, մյուսը՝ «Թրանսփարենսի Ինտերնեյշնլ» կազմակերպության կողմից, իսկ երրորդը՝ ՀԿ-ի: Առաջինը վերաբերում է քվեարկության օրն իրականացվող քարոզչությանը, երկրորդը՝ iDitort.org կայքի վրա տեխնիկական հարձակման խնդիրներին, որը նույն օրը վերականգնվել էր, երրորդում որոշակի խախտման փաստերի հղում է կատարվում տարբեր կայքերի ամրագրած տեղեկություններին», - նշեց ԿԸՀ նախագահը՝ հավելելով, որ քվեաթերթիկների վերահաշվարկի բողոքները կներկայացվեն այսօր: