Նախնական տվյալներով ես հավաքել եմ 20 000 քվե. Սամվել Ֆարմանյան

Թիվ 2 ընտրատարածքում առաջադրված պատգամավորության թեկնածու, ՀՀԿ-ական Սամվել Ֆարմանյանն իր Facebook-ի էջում գրում է.

«Նոր Նորքի 2-րդ ընտրատարածքում ընտրություններն ավարտված են: Նախնական տվյալներով ես հավաքել եմ 20 000 քվե և համոզիչ հաղթանակ տարել ընտրություններում:

Շնորհակալություն եմ հայտնում իմ բոլոր աջակիցներին, համախոհներին ու ընկերներին, որ ընտրական այս երկար մարաթոնի ողջ ընթացքում կանգնեցին իմ կողքին և մենք միասին հաղթեցինք:

Շնորհակալություն եմ հայտնում մրցակցիս՝ Վ. Կարապետյանին և նրան աջակցող քույր կուսակցություններին՝ արժանի քաղաքական մրցակցության համար: Ցավում եմ, որ Վլադիմիրին չեմ տեսնի նոր խորհրդարանում:

Շնորհակալություն եմ հայտնում ինձ կողմ չքվեարկած բոլոր մասիվցիներին և խոստանում՝ 5 տարի շարունակ՝ 1826 օր աշխատել այնպես, որ նրանցից յուրաքանչյուրը ժամանակի հեռվից իրենց մայիսվեցյան ընտրությունը համարեն չհիմնավորված:

Վերջապես, շնորհակալություն իմ ընտանիքին, որ ամիսներ շարունակ ընբռնումով մոտեցան իմ գերզբաղվածությանը և ամեն կերպ սատար կանգնեցին ինձ:

Հ.Գ. Ինչպես և խոստացել էի, կընդունեմ մրցակցիս՝ Վ. Կարապետյանի հրավերը և մայիսի 19-ին կգնամ իրենց տուն՝ միասին դիտելու չեմպիոնների լիգայի եզրափակիչը՝ Չելսի-Բավարիա հանդիպումը, թեկուզև ուշացած, բայց բոլորին փոխանցելու պարզագույն մի ուղերձ՝ քաղաքական մրցակցությունը երբեք չպետք է բերի անձնական թշնամության և անհանդուրժողականության!!!!!

Աստված բոլորիս պահապան:»